कल्याण-डोंबिवलीत पाण्याचे लोड शेडिंग !, महापालिका क्षेत्रात आणि २७ गावांचे पाणीबाणीचे वेळापत्रक जारी

कल्याण आणि डोंबिवली ही खरी तर स्वतंत्र महापालिका होईल इतकी या शहरांची लोकसंख्या आणि वाढ झाली आहे. गेली अनेक वर्षे या भागातील लोकसंख्या प्रचंड वाढली असताना आणि आता पाण्याच्या असमान वाटपाने अनेक भागातील पाणी समस्या कायम पाचवीला पूजलेली असताना या मान्सूनमध्ये कल्याण आणि डोंबिवलीवर पाणी बंदीची कुऱ्हाड कोसळणार आहे. या भागाला एमआयडीसीकडून होणाऱ्या पाणी पुरवठ्यात आता कपात करण्यात येणार आहे. त्यामुळे डोंबिवली आणि कल्याणच्या रहिवाशांना पाणी बचत करावी लागणार आहे.

अल निनोमुळे 31 ऑगस्टपर्यंत कमी पर्जन्यमानाचा अंदाज असल्याने यंदा महाराष्ट्रात पाण्याच्या मोठा तुटवडा जाणवत आहे. अशाच प्रकारे पावसाने ओढ देण्याचा क्रम चालू राहाण्याचा अंदाज असल्याने उरलेले पाणी टीकवण्यासाठी आता केडीएमसी आणि एमआयडीसीकडून विशेष पाणी नियोजन करण्यात आले आहे.

दोन दिवस टँकर देखील बंद

30 जूनला संपूर्ण कल्याण-डोंबिवली महानगरपालिका क्षेत्रात 24 तासांचा वॉटर शटडाऊन जाहीर करण्यात आला आहे. तर शटडाऊनच्या दिवशी आणि त्यानंतरच्या दिवशी असे दोन दिवस टँकरद्वारे होणारा पाणीपुरवठा देखील बंद ठेवण्यात येणार आहे. तसेच एमआयडीसीकडून पाणीपुरवठा होणाऱ्या 27 गाव परिसरात शुक्रवार ते रविवार 48 तासांचा शटडाऊन असणार आहे. नागरिकांनी आवश्यक तेवढाच पाणीसाठा करण्याचे आवाहन प्रशासनाने केले आहे.

नागपूरातही पाणीबाणी

वीजपुरवठा बाधित झाल्याने शुक्रवारी नागपूर मनपाच्या 10 झोनपैकी 9 झोनमध्ये पाणी पुरवठा ठप्प झाला. महावितरणच्या मनसर सबस्टेशनमध्ये अचानक तांत्रिक बिघड झाल्यामुळे नवेगाव वॉटर पंपिंग स्टेशनचा वीजपुरवठा पूर्णपणे खंडित झाला आहे. धरणातून येणारे रॉ वॉटरचे पंपिंग ठप्प झाले आहे, या मोठ्या तांत्रिक बिघाडामुळे बुधवारी संध्याकाळी पाणीपुरवठा विस्कळीत झाला होता.

तसेच आज सकाळी शहरातील तब्बल नऊ झोनमधील पाणीपुरवठा विस्कळीत झाला होता, तर काही ठिकाणी पूर्णपणे पाणी पुरवठा बंद राहण्याची दाट शक्यता वर्तवण्यात आली होती. वीज पुरवठा पूर्ववत होण्यास विलंब झाल्याने नागपूरकरांना पाणीबाणीला सामोरे जावे लागू शकते अशी भीती व्यक्त केली जात आहे.

गोरेवाडा आणि गोधणी येथील शुद्धीकरण केंद्रांना रॉ वॉटर पुरवणारे नवेगाव खैरी धरण हा नागपूरचा एकमेव एकमेव मुख्य स्त्रोत आहे. पाण्याच्या पंपिंगमधील या व्यत्ययामुळे जलशुद्धीकरण आणि पुढील वितरण प्रक्रियेचे संपूर्ण गणित कोलमडले आहे. आज लक्ष्मी नगर झोन, धरमपेठ झोन, हनुमान नगर झोन, धंतोली झोन, नेहरूनगर झोन ,गांधीबाग झोन, सतरंजीपुरा झोन, आशी नगर झोन, मंगळवारी झोन मधील पाणीपुरवठा ठप्प होण्याची शक्यता आहे.