यंत्राच्या बेल्टमध्ये पदर अडकला, डोकं यंत्रावर आदळून विवाहितेचा मृत्यू! 11 महिन्यांचं बाळ पोरकं

अहमदनगर : अहमदनगर (Ahmednagar) तालुक्यातील नेवासा (Nevasa) येथे अत्यंत दुर्दैवी घटना घडली. जनावरांसाठी कडबाकुट्टी करत असताना दुर्लक्ष होऊन एका महिलेचा पदर कडबा कुट्टी करणाऱ्या यंत्राच्या बेल्टमध्ये अडकला. यंत्रात फिरणाऱ्या बेल्टसोबत महिलाही तितक्याच वेगाने ओढली गेली. मशीनच्या मागील बाजूला तिचे डोके आदळले. महिलेला वाचवण्यासाठी आजूबाजूचे लोक आले. तिला रुग्णालयातही नेण्यात आलं. मात्र रस्त्यातच तिचा मृत्यू (Woman Died) झाला. नेवाशात या अत्यंत हृदयद्रावक घटनेची चर्चा असून नागरिकांमधून हळहळ व्यक्त केली जात आहे.

कुठे घडली विचित्र घटना?

याविषय़ी अधिक मागिती अशी की, अहमदनगर नेवासा तालुक्यातील देवगाव येथे धक्कादायक घटना घडली. या विचित्र अपघातात सरिता अजिनाथ गवते (वय 25 वर्षे) असं या महिलेचं नाव आहे. पती आजिनाथ आणि सरिता दोघे सकाळी सात वाजेच्या सुमारास जनावरांसाठी कडबा कुट्टी तयार करत होते.

यावेळी नजर चुकीने सरिता यांचा पदर कडबा कुट्टी करणाऱ्या यंत्राच्या बेल्टमध्ये अडकला. हा पदर एवढा वेगाने यंत्रात ओढला गेला की. सरिता यांचे डोके मशीनवर मागील बाजूने जोरदार आदळले. त्यांच्या डोक्याला मोठी जखम झाली. जागेवार रक्तस्राव सुरु झाला. हा विचित्र अपघात पाहून आजूबाजूचे लोक मदतीसाठी धावले.

रुग्णालयात नेताना मृत्यू

सरीताचे पती आणि मदतीसाठी आलेल्या लोकांनी त्यांना तत्काळ रुग्णायलायत हलवलं. मात्र अहमदनगर येथील रुग्णालयात जातानाच रस्त्यातच त्यांचा दुर्दैवी अंत झाला. काही क्षणात होत्याचं नव्हतं झालं, हे पाहून गावकऱ्यांनी हळहळ व्यक्त केली.

गाव शोकाकूल

देवगाव परिसरातील नागरिकांना या घटनेमुळे मोठा धक्का बसला आहे. सरिता यांना तीन वर्षांचा मुलगा तसेच 11 महिन्यांची लहान मुलगी आहे. या कोवळ्या मुलांना काय घडतंय हे कळतच नव्हतं आईची अशी अवस्था पाहून ती दोघंही धाय मोकलून रडत होती. देवगाव येथे सरिता यांच्यावर अंत्यसंस्कार होत आहेत.