मित्राच्या लग्नाला कारने चालले होते, पण मित्राच्या आनंदात सहभागी होण्याआधीच तरुणांवर काळाचा घाला

अमरावती : सध्या लग्नसमारंभाचा काळ जोरदारपणे सुरू आहे. त्यामुळे विवाहासाठी अनेक जण कार, दुचाकीने कार्यक्रमाला पोहचण्यासाठी भरधाव वेगाने प्रवास करत आहेत. त्यामुळे सध्या अपघातांचेही प्रमाण वाढले आहे. याच प्रकारे एका विवाहाला जात असताना लासूरजवळ कार आणि दुचाकीचा अपघात होऊन तिघांचा जागीच मृत्यू झाल्याची दुर्देवी घटना घडली आहे. भरधाव कार आणि दुचाकीच्या भीषण अपघातात तिघांचा मृ्त्यू झाला असून या अपघातानंतर काही काळ या मार्गावरची वाहतूक ठप्प झाली होती.

या अपघातात अन्य दोघे जण गंभीर जखमी झाले आहेत. ही घटना दर्यापूर अकोला मार्गावरील गोळेगावनजीक गुरवारी सायंकाळी घडली आहे.

प्रफुल्ल गावंडे (वय 27), प्रतिक राऊत (वय 25), दोघेही रा.बुलढाणा व सचिन रामकृष्ण दुधंडे (वय 31 रा.लासुर ता.दर्यापूर) असे अपघातात मृत्यू झालेल्यांची नावे आहेत. तर पवन रामचंद्र तायडे (वय 27) व शुभम नागपूरे (वय 25) रा.बुलढाणा हे गंभीर जखमी झाले आहेत.

ज्या दुचाकीला कारने उडवले आहे ती कार (क्र.एम.एच.12 के.एन. 4028) ने अकोला येथून भरधाव वेगाने दर्यापूर मार्गे अमरावतीला जात होते.

दरम्यान मृतक सचिन दुधंडे दर्यापुरवरून गावी लासुर येथे दुचाकी (क्रमांक एम.एच.27 डी.बी.1116) ने जात होते. गोळेगाव नजीक भरधाव कारने समोरील दुचाकीला धडक दिल्याने दुचाकीस्वार व कारमधील दोघांचा घटनास्थळीच मृत्यू झाला.

या भीषण अपघातात कार पलटी होऊन चक्काचूर झाला आहे. गंभीर जखमींना पुढील उपचारासाठी अकोला येथील रुग्णालयात दाखल करण्यात आले आहे.

या घटनेची माहिती मिळताच दर्यापूर पोलिसांनी घटनास्थळी धाव घेतली होती. तसेच मृतक दुधंडे यांच्या नातेवाईकांनी उपजिल्हा रुग्णालयात मोठी गर्दी केली होती. या अपघातातील जखमींची प्रकृती चिंताजनक असल्याचे डॉक्टरांनी सांगितले आहे.