Amruta Fadnavis : कधी गरज पडली तर फक्त सांगा, सदैव मदतीला तयार, अमृता फडणवीस यांचा जनतेला शब्द!

Amruta Fadnavis : बीड जिल्ह्यातील आष्टी येथे मुख्यमंत्री देवेंद्र फडणवीस यांच्या वाढदिवसानिमित्त महाआरोग्य मोफत शिबीराचे आयोजन करण्यात आले होते. आमदार सुरेश धस हे या आरोग्य शिबिराचे आयोजक होते. या शिबीराच्या उद्घाटनासाठी देवेंद्र फडणवीस यांच्या पत्नी अमृता फडणवीस यांची उपस्थिती होती. यावेळी आमदार सुरेश धस यांनी अमृता फडणवीस यांना फेटा बांधून त्यांचा सन्मान आणि स्वागत केले. या शिबीरासाठी जिल्ह्यातुन लाखो लोक दाखल झाले. या महाआरोग्य शिबिराच्या उद्घाटन कार्यक्रमास डॉ. तात्याराव लहाने हेदेखील उपस्थित होते. दरम्यान, कार्यक्रमात अमृता फडणवीस यांनी उपस्थितांना संबोधित केले. भाषणात त्यांनी आरोग्यविषयक काही मदत लागली तर मला सांगा. मी मदत करायला तयार आहे, असा शब्द उपस्थित नागरिकांना दिला.

येथे मेडिकल कॉलेज नक्कीच पाहिजे

या आरोग्य शबिरात 30 हजार लोक तपासणी करून गेले आहेत. या शिबिराचा जास्तीत जास्त वापर करून घ्या. सुरेश धस यांना मी धन्यवाद देते. सुरेश धस आष्टीमध्ये वैद्यकीय महाविद्यालय हवे, असे सांगितले. धस जे बोलतायत ते योग्य आहे. येथे मेडिकल कॉलेज नक्कीच पाहिजे. आपल्याकडे पद आल्यानंतर आपण सत्ता मोठी करायची असते कारण सत्ता मोठी झाली तर माणूस मोठा होत असतो, असे मत अमृता फडणवीस यांनी व्यक्त केले.

कधी कोणाला गरज पडली तर…

तसेच, त्यांनी सुरेश धस यांचेही कौतुक केले. सुरेश धस तुमच्यासाठी (नागरिकांसाठी) पूर्णपणे सक्रिय आहेत. तुम्हाला काही मदत लागली तर मीदेखील सदैव उपलब्ध आहे. कधी कोणाला गरज पडली तर मी त्याची मदत करेल, असा शब्द अमृता फडणवीस यांनी दिला. तसेच सुरेश धस यांनी अशा कार्यक्रमांना मला सतत बोलवत राहावे. मला लोकांमध्ये जायला आवडते, अशी विनंतीही सुरेश धस यांना केली. या कार्यक्रमात सुरेश धस यांनी अमृता फडणवीस यांच्या कामाचे कौतुक केले. अमृता फडणवीस वेगवेगळ्या समाजघटकाची सेवा करण्याचे काम करतात, असे सुरेश धस म्हणाले.