बायकोशी झालेल्या भांडणामुळे पोलिसांची धावपळ, बीडीडीएसचे पथक विमानतळावर

दत्ता कानवटे, छत्रपती संभाजीनगर : ‘मुख्यमंत्री एकनाथ शिंदे (Eknath Shinde) यांना उडवून देणार’ असा धमकीचा कॉल दोन दिवसांपूर्वी आल्याने राज्यभरात खळबळ माजली होती. पोलीस यंत्रणा अलर्ट झाली होती. तपासाची सूत्र वेगाने हलवण्यात आली होती. मग काही तासांत मुख्यमंत्री एकनाथ शिंदे यांना धमकी देणाऱ्या व्यक्तीला पुण्यातून ताब्यात घेण्यात आलंय. राजेश मारूती आगवणे असं या आरोपीचं नाव आहे. या व्यक्तीने कौटुंबिक वादातून मुख्यमंत्र्यांना धमकी दिली होती, असे तपासात स्पष्ट झाले होते. आता बायोकोशी भांडण झाल्याच्या वादातून विमानतळ उडवून देण्याची धमकी देण्यात आली.

काय आहे प्रकार

आधी कौटुंबिक वादातून मुख्यमंत्र्यांना धमकी दिली गेली होती. आता बायकोशी भांडण झाल्याने विमानतळ उडवण्याची धमकी आली आहे. मांगिरबाबाच्या जत्रेला जात असताना गाडीतील चार व्यक्ती उद्या व परवा छत्रपती संभाजीनगरचे विमानतळावर बॉम्बस्फोट करणार असल्याची चर्चा करत होते, अशी माहिती देणारा फोन पोलिसांच्या नियंत्रण कक्षाला आला या फोनमुळे सर्व यंत्रणा खडबडून जागी झाली. यानंतर एमआयडीसी सिडको पोलिसांसह बीडीडीएसच्या पथकाने विमानतळावर धाव घेतली.

पथकाने केली तपासणी

महाराष्ट्र पोलिसांचे बीडीडीएस पथक हे व्हीव्हीआयपी, व्हीआयपी दौरे यांची सुरक्षा अन् सार्वजनिक किंवा गर्दीच्या ठिकाणी संशयीत व बाँब सदृश्य भागाची तपासणी करते. हे पथकही संभाजीनगर विमानतळावर आले. त्याठिकाणी तपासणी केल्यानंतर काहीच नसल्याचे निष्पन्न झाले. यानंतर फोन लावणाऱ्या व्यक्तीचा शोध घेतला असता त्याने बायको सोबत भांडण झाल्यामुळे असा फोन केल्याचे सांगितले. कारभारी कडुबा रिठे असे फोन करणाऱ्याचे नाव आहे. तो रिक्षाचालक असून त्याला पोलिसांनी ताब्यात घेतले आहे. या प्रकारानंतर पोलिसांनी डोक्याला हात लावला. कारण बायको अन् नवऱ्याचे झालेले भांडण पोलिसांच्या धावपळीला कारणीभूत ठरले.

त्याने तर दिली मुख्यमंत्र्यांना धमकी

११ एप्रिल रोजी मुख्यमंत्री एकनाथ शिंदे यांना धमकी आली होती. धमकी देणाऱ्याने दारूच्या नशेत हा फोन केल्याची माहिती पोलिसांनी दिली आहे. आरोपी राजेश मारुती आगवणे याने कौटुंबिक वादानंतर मद्यप्राशन करून सदर कॉल केल्याचा दावा पोलिसांनी केलाय. आरोपीची बायको पुण्यात धायरी येथे वास्तव्यास आहे. तर पुण्यातील वारजे येथून आरोपीने धमकी देणारा फोन केला. 112 नंबरला सोमवारी रात्री ‘मी एकनाथ शिंदे यांना उडवणार आहे..’ असे बोलून त्याने फोन कट केला. त्यानंतर पोलिसांनी वेगाने सूत्रे हलवली. वारजे येथून आरोपीचे लोकेशन मिळाले. सदर आरोपी मारुती आगवणे हा शास्त्री नगर धारावी येथील रहिवासी असल्याची माहितीदेखील पोलीस तपासात उघड झाली आहे.