कोर्टाचा सवाल अन् भोंदू खरातने थेट हातच जोडले; सुनावणीवेळी काय घडलं न्यायालयात? कोठडी सुनावली

भोंदूबाबा अशोक खरात प्रकरणात आज नाशिक जिल्हा सत्र न्यायालयात सुनावणी झाली. न्यायालयाने आरोपी अशोक खरात याला ८ एप्रिलपर्यंत पोलिस कोठडी सुनावली आहे. आजच्या सुनावणीसाठी अशोक खरात याला व्हिडिओ कॉन्फरन्सिंग (VC) द्वारे उपस्थित करण्यात आले होते. त्याच्या सुरक्षेच्या कारणास्तव SIT ने व्हीसीद्वारे हजर करण्याचा अर्ज केला होता, जो न्यायालयाने मान्य केला. न्यायालयात ही ऑनलाइन सुनावणी पार पडली. कोर्टरूममध्ये यासाठी ४ स्क्रीन्स लावण्यात आल्या होत्या.

आजच्या सुनावणीत काय घडले?

सुनावणी सुरू झाल्यावर न्यायाधीशांनी अशोक खरात यांना नाव विचारले. आवाज कमी येत असल्याने न्यायाधीशांनी त्यांना मोठ्याने बोलण्यास सांगितले. त्यानंतर न्यायाधीशांनी विचारले, “तुमचे वकील म्हणून भाटे वकील इथे बाजू मांडत आहेत, ते तुमचे वकील आहेत का?” यावर अशोक खरात यांनी “हो” असे उत्तर दिले. सुनावणीच्या शेवटी न्यायाधीशांनी आरोपीला विचारले, “तुम्हाला काही बोलायचे आहे का?” यावर अशोक खरातने हात जोडून “काही नाही” असे सांगितले.

कोर्टात काय घडलं?

-आरोपीने पीडितेवर अत्याचार केल्याने ती गर्भवती राहिली.

-त्याने दिलेल्या गोळ्यांमुळे गर्भपात झाला.

-लग्नाचं आमिष दाखवून आणि मराणाची भीती घालून महिलेवर अत्याचार

-पीडितेच्या मुलांनाही धमकी दिली

-गोळ्या आणि औषध कुठून आणले, त्यात काय होते याचा तपास अद्याप बाकी आहे.

-आरोपी पीडितेकडून आधारकार्ड आणि पॅनकार्ड मागत होता, हे कशासाठी होते याचा तपास करायचा आहे.

-तपासासाठी ७ दिवसांची पोलिस कोठडी आवश्यक असल्याचे तपास अधिकाऱ्यांनी सांगितले.

आरोपीचे वकील भाटे यांचे म्हणणे:

-हा आरोपीचा दुसरा गुन्हा आहे.

-यापूर्वी १४ दिवस पोलिस कोठडी झालेली आहे.

-अद्याप त्यांच्याकडे फिर्याद प्रत आलेली नाही.

-गर्भपात झाल्याचे सांगितले जात आहे, त्याचा कालावधी किती होता?

-सोशल मीडियावर काही व्हिडिओ व्हायरल होत आहेत, त्यावरही गुन्हा दाखल झाला आहे.