लग्नात पोलिसांची एन्ट्री होताच थरकाप, अंगावरच्या कपड्यावरच नवरदेव पळाला, अख्ख वऱ्हाड तुरुंगात; काय घडलं?
एक धक्कादायक प्रकरण समोर आले आहे. अल्पवयीन मुलीचा विवाह होत असल्याची चाहूल लागताच पोलिसांनी मोठी कारवाई केली आहे. पोलीस लग्नमांडवात येताच नवरदेव फरार झाला आहे.
बीड जिल्ह्यातून एक धक्कादायक प्रकरण समोर आले आहे. कपिलधार येथे अल्पवयीन मुलीचा बालविवाह रोखण्यासाठी पोलिसांनी केलेली कारवाई थरारक ठरली आहे. बालविवाह होत असल्याची गोपनीय माहिती मिळताच पोलिस आणि सामाजिक कार्यकर्त्यांच्या पथकाने घटनास्थळी छापा टाकला. मात्र, पोलिसांची चाहूल लागताच नवरदेवाने लग्न मंडपातूनच पलायन केले. तो एका साथीदाराच्या मदतीने बुलेट मोटारसायकलवर बसून फरार झाला. या धावपळीचा व्हिडीओ सोशल मीडियावर व्हायरल झाला असून, संपूर्ण घटनेमुळे परिसरात खळबळ उडाली आहे.
नेमकं काय घडलं?
बीड जिल्ह्यातील कपिलधार देवस्थान परिसरातील एका मंगल कार्यालयात (देवस्थान परिसरात) एका अल्पवयीन (सुमारे १६ वर्षीय) मुलीचा विवाह लावला जात असल्याची माहिती जिल्हा बाल संरक्षण कक्ष, सामाजिक कार्यकर्ते आणि पोलिसांना मिळाली होती. या माहितीच्या आधारे बीड ग्रामीण पोलीस ठाण्याच्या अँटी ह्युमन ट्रॅफिकिंग युनिट (AHTU)च्या पथकाने दुपारी घटनास्थळी धाव घेतली.
पथक पोहोचले तेव्हा विवाहाचे काही विधी नुकतेच पार पडले होते. पोलिसांची गाडी आणि पथक दिसताच नवरदेवाची घाबरगुंडी उडाली. त्याने क्षणाचाही विलंब न करता मंडपातून बाहेर पळ काढला आणि एका साथीदाराच्या बुलेटवर बसून घटनास्थळावरून पळून गेला. या पलायनाचा व्हिडीओ लोकांनी मोबाईलवर कॅप्चर केला असून, तो सध्या सोशल मीडियावर मोठ्या प्रमाणात व्हायरल होत आहे. व्हिडीओमध्ये ‘अरे पळवू नका त्याला…’ अशा ओरडणाऱ्या आवाजाही ऐकू येत आहेत.
कठोर कारवाई आणि गुन्हे दाखल
या प्रकरणी बीड ग्रामीण पोलीस ठाण्यात बालविवाह प्रतिबंधक कायद्यांतर्गत (Prohibition of Child Marriage Act, 2006) गुन्हा दाखल करण्यात आला आहे. फरार नवरदेव, वधू-वराचे आई-वडील, जवळचे नातेवाईक, वऱ्हाडी मंडळी आणि कपिलधार देवस्थानचे विश्वस्त अशा एकूण १०० जणांविरुद्ध (काही रिपोर्ट्सनुसार ६८ ते ७० जण) गुन्हे नोंदवले गेले आहेत.
पोलिसांनी अल्पवयीन मुलीला सुरक्षित ताब्यात घेतले असून, तिचे समुपदेशन आणि आवश्यक काळजी घेतली जात आहे. फरार नवरदेव आणि इतर काही आरोपींचा शोध सुरू आहे. बीड जिल्ह्यात बालविवाहाचे प्रकार यापूर्वीही अनेकदा उघडकीस आले आहेत. असे बेकायदेशीर विवाह रोखण्यासाठी पोलिस आणि सामाजिक संस्था सातत्याने जनजागृती आणि कारवाई करत असल्या तरी छुप्या पद्धतीने असे प्रकार घडत असल्याचे या घटनेतून पुन्हा स्पष्ट झाले आहे. सध्या पोलिसांनी पुढील तपास सुरू केला असून, सर्व आरोपींना कायद्याच्या कठोर चौकटीत आणण्याचे प्रयत्न सुरू आहेत.
