पाठलाग करायचा, गुपचूप फोटो काढायचा आणि स्वत:च्या फोटोशी… फोन जप्त करताच पोलिस हादरले
बीड जिल्ह्यातील केज तालुक्यात एक अजब आणि चिंताजनक प्रकार समोर आला आहे. एका युवकाने एआयचा वापर करुन भयानक कांड केले. जेव्हा त्याचा फोन जप्त केला तेव्हा त्याच्या फोनमधील डेटा पाहून पोलिसही हादरले.
दिवसेंदिवस एआय तंत्रज्ञानाचा (आर्टिफिशियल इंटेलिजेंसचा) वापर वाढत चालला आहे. आर्टिफिशियल इंटेलिजेंसमुळे अनेक गोष्टी करणे सोप झाले आहे. एखादा फोटो एडीत करण्यासाठी तर आर्टिफिशियल इंटेलिजेंसचा मोठा फायदा होत आहे. पण नाण्याच्या जशा दोन बाजू असतात तसेच एखाद्या तंत्रज्ञानाच्या फायद्यांसोबत तोटे देखील असतात. एआयचे जसे चांगले फायदे आहेत तसेच तोटे देखील आहेत. याचाच पुरावा देणारी घटना बीड जिल्ह्यातून समोर आली आहे.
नेमकं काय घडलं?
बीड जिल्ह्यातील केज तालुक्यात एक अजब आणि चिंताजनक प्रकार समोर आला आहे. एका अविवाहित युवकाने एआय तंत्रज्ञानाचा वापर करत महिलेच्या फोटोसोबत स्वतःचा फोटो जोडला आणि तिचा सतत पाठलाग सुरू ठेवला. या प्रकाराला कंटाळून पीडित महिलेने केज पोलीस ठाण्यात फिर्याद दाखल केली. तपासात आरोपीच्या मोबाइलमधून ५०हून अधिक महिला व मुलींचे गुपचूप काढलेले फोटो सापडले असून पोलिसांनी त्याला अटक केली आहे.
पोलिसात तक्रार दाखल
पीडित महिलेच्या म्हणण्यानुसार, आरोपी गेला काही काळ तिचा सतत पाठलाग करत होता. त्याने तिचे फोटोही काढले होते. या त्रासाला कंटाळून महिलेने केज पोलीस ठाण्यात रीतसर तक्रार नोंदवली. तक्रारीच्या आधारे पोलिसांनी तपास सुरू केला आणि आरोपीला ताब्यात घेतले.
तपासात आरोपीने एआय तंत्रज्ञानाचा वापर करत महिलेच्या फोटोसोबत स्वतःचा फोटो जोडला असल्याचे समोर आले. तसेच त्याच्या मोबाइलमधून ५०हून अधिक महिला व मुलींचे छुप्या पद्धतीने काढलेले फोटो जप्त करण्यात आले. आरोपी गुपचूप महिला आणि मुलींचे फोटो काढून त्यांचा पाठलाग करत असल्याचेही तपासात उघड झाले आहे. पोलिसांनी आरोपीला अटक केली असून न्यायालयाने त्याला न्यायालयीन कोठडी सुनावली आहे. या प्रकरणात पुढील तपास सुरू आहे.
