आधी विलीनीकरणाच्या चर्चेतून तटकरे बाजूला, नंतर आमदारांना वळवण्याचा प्रयत्न? शिंदेसेनेच्या आमदाराचा धक्कादायक दावा

एकीकडे दोन्ही राष्ट्रवादी काँग्रेस पक्ष एकत्र येणार का आणि शरद पवार पुन्हा एनडीएला पाठींबा देणार का ? असे वातावरण असताना आता अजितदादा यांच्या अपघाती मृत्यूचे प्रकरण पुन्हा उकरुन काढले जात आहे. अजितदादांच्या अपघाती निधनानंतर राष्ट्रवादी काँग्रेसमधील राजकीय घडामोडींवरून आता नवा वाद पेटला आहे. रामदास कदम यांनी केलेल्या वक्तव्याचे समर्थन करत शिंदेसेनेचे आमदार महेंद्र थोरवे यांनी राष्ट्रवादीतील विलीनीकरणाच्या चर्चेवर आणि त्यावेळच्या राजकीय हालचालींवर गंभीर प्रश्न उपस्थित केले आहेत.

विलीनीकरणाच्या चर्चा सुरू असताना सुनील तटकरे यांना कुठेही बोलावले जात नव्हते. पवार कुटुंबीय आणि त्यांचे विश्वासू नेते एकत्र बसून चर्चा करत होते, असा दावा आमदार महेंद्र थोरवे यांनी केला.  तसेच अजितदादांचे अपघाती निधन झाल्यानंतर सिटी ईन हॉटेलमध्ये आमदारांना आपल्याकडे वळवण्याचे प्रयत्न झाल्याचा आरोपही सुनील तटकरे यांनी केला होता. मात्र हे प्रयत्न यशस्वी झाले नाहीत. त्यानंतर तीन दिवसांनी सुनेत्रा पवार यांनी शपथविधी घेतला, असेही त्यांनी नमूद केले.

अजितदादांच्या अपघाती निधनामागे घातपात होता का आणि या प्रकरणात सुनील तटकरे यांची काही भूमिका होती का?, याची निष्पक्ष चौकशी व्हावी असेही आमदार महेंद्र थोरवे यांनी म्हटले आहे. अजितदादा यांच्या विमान अपघातावरुन होणाऱ्या या आरोपांबाबत कोणताही निष्कर्ष अद्याप सिद्ध झालेला नाही. संबंधित व्यक्तींची अधिकृत भूमिका आणि तपास यंत्रणांची माहिती महत्त्वाची ठरणार आहे.