बीडमध्ये गुन्हेगारीचा हैदोस, मध्यरात्री घरात घुसून गोळीबार, भयानक थरार
बीडमध्ये गुन्हेगारीच्या घटनांमध्ये वाढ झाली असून, काल मध्यरात्री झालेल्या गोळीबाराच्या घटनेत एक तरुण गंभीर जखमी झाला आहे. जुन्या वादातून हा गोळीबार झाला असून, आरोपी फरार आहेत. यापूर्वी, मस्साजोग येथे सरपंचाची हत्या झाल्याने बीडमध्ये मोठी खळबळ उडाली होती.
बीडमध्ये हिंसाचाराच्या घटना काही केल्या कमी होताना दिसत नाही. बीडच्या मस्साजोग येथे सरपंचाची क्रूरतेने हत्या केल्याची घटना ताजी असतानाच बीडमध्ये जुन्या वादात बदनामी झाल्याच्या रागातून घरात घुसून गोळीबार केल्याची घटना समोर आली आहे. या घटनेत एक तरुण गंभीर जखमी झाला आहे. या तरुणाला उपचारासाठी छत्रपती संभाजीनगर येथे तातडीने हलविण्यात आले आहे. या घटनेमुळे संबंधित परिसरात एकच खळबळ उडाली आहे. जुन्या वैमनस्यातून ही घटना घडल्याची माहिती आहे. या प्रकरणी पोलिसांचा तपास सुरु असल्याची माहिती मिळत आहे.
नेमकं काय घडलं?
विश्वास दादाराव डोंगरे असे जखमीचे नाव आहे. विश्वास डोंगरे आणि अक्षय आठवले यांच्यात जुना वाद आहे. यापूर्वी दोन गटात मारहाणीची घटना घडली होती. याप्रकरणी परस्पर तक्रारीवरून पेठ बीड पोलीस ठाण्यात गुन्हा दाखल आहे. शुक्रवारी मध्यरात्री दोनच्या सुमारास अक्षय आठवले याने डोंगरे यांच्या इमामपुर रोडवरील घरात घुसून गोळीबार केल्याची माहिती समोर येत आहे. यामध्ये डोंगरे हे गंभीर जखमी झाले आहेत. त्यांना तातडीने उपचारासाठी छत्रपती संभाजीनगर येथे हलविण्यात आले. या प्रकरणाचा अधिक तपास पेठ बीड पोलीस करत आहे. या प्रकरणी तीन जणांविरुद्ध गुन्हा दाखल करण्यात आला असून सर्व आरोपी फरार आहेत.
बीडमधील ‘या’ घटनेमुळे राज्य हादरलं
बीडमधील गुन्हेगारीच्या घटना सध्या सातत्याने चर्चेत येत आहेत. मस्साजोग येथे सरपंचाच्या अपहरण आणि हत्येच्या घटनेमुळे संपूर्ण राज्य हादरलं आहे. या घटनेतील आरोपींनी सरपंच संतोष देशमुख यांचं आधी अपहरण केलं होतं. त्यानंतर त्यांची निर्घृणपणे खून केला होता. या घटनेमुळे संपूर्ण बीड जिल्हा हादरला होता. या घटनेनंतर मस्साजोग गावच्या नागरिकांनी रास्ता रोको आंदोलन करत न्यायाची मागणी केली होती. या प्रकरणातील आरोपींना अटक करुन फाशीची शिक्षा द्यावी, अशी मागणी करण्यात आली होती. गावकऱ्यांनी दिवसभर रास्ता रोको आंदोलन केलं होतं. तसेच आपल्या मागण्या मान्य होत नाही तोपर्यंत आपण संतोष देशमुख यांचा मृतदेह ताब्यात घेणार नाही, असा पवित्रा गावकऱ्यांनी घेतला होता.
यानंतर पोलीस अधिक्षकांनी गावकऱ्यांशी संवाद साधत त्यांच्या सर्व मागण्या मान्य केल्या होत्या. या प्रकरणी पोलीस अधीक्षकांनी दोन बड्या अधिकाऱ्यांवर निलंबनाची कारवाई केली होती. तसेच काही आरोपींना अटक केली होती. या प्रकरणाचा देखील तपास पोलिसांकडून सुरु आहे.
