विदर्भातील तुमसर बाजार समिती निवडणुकीला स्थगिती, निवडणूक लांबणीवर, नागपुर खंड पीठाचा निर्णय
Tumsar Agricultural Produce Market Committee : तुमसर कृषी उत्पन्न बाजार समितीच्या निवडणूक प्रक्रियेअंतर्गत 27 मार्चपासून नामनिर्देशन पत्र दाखल करण्यात आले होते. यासाठी 3 एप्रिल अखेरची दिनांक होती.
तेजस मोहतुरे, भंडारा : भंडारा (bhandara) जिल्ह्याच्या मोहाडी (mohadi) तालुक्यातील 58 ग्रामपंचायतीच्या निवडणुका (Grampanchayat election) झाल्या नाहीत, त्यामुळे कृषी उत्पन्न बाजार समितीच्या निवडणुकीत सरपंच व सदस्यांना प्रतिनिधित्व नसल्याच्या मुद्यावरून विदर्भातील श्रीमंत बाजार समिती म्हणून ओळखल्या जाणाऱ्या तुमसर बाजार समिती निवडणुकीला स्थगिती देण्यात आली आहे. याबाबत उच्च न्यायालयाच्या नागपूर खंडपीठात याचिका दाखल केली होती. त्यावर काल सोमवारी झालेल्या सुनावणीत न्यायालयाने तुमसर बाजार समितिची पूर्ण निवडणूक प्रक्रियेला स्थगिती दिली आहे. त्यामुळे आता तुमसर बाजार समितीची निवडणूक लांबणीवर गेली आहे. हरदोली येथील माजी सरपंच सदाशिव ढेंगे यांनी ही याचिका दाखल केली होती. त्यांच्या प्रयत्नाला आता यश आले आहे.
तुमसर कृषी उत्पन्न बाजार समितीच्या निवडणूक प्रक्रियेअंतर्गत 27 मार्चपासून नामनिर्देशन पत्र दाखल करण्यात आले होते. यासाठी 3 एप्रिल अखेरची दिनांक होती. काल याचिकेवर सुनावणी झाली असता कृषी उत्पन्न बाजार समितीमध्ये तुमसर आणि मोहाडी या तहसीलमधील मतदारांचा समावेश आहे. सद्या 17 नोव्हेंबर 2022 पासून नियुक्त असलेले प्रशासकच बाजार समितीचा कारभार पाहत आहेत.
1963 च्या अधिनियमाच्या कलम 13 (1) च्या तरतुदींनुसार बाजार समितीने इतर सदस्यांसह ग्रामपंचायत सदस्यांनी निवडलेले चार सदस्य असणे आवश्यक आहे. तुमसर आणि मोहाडी तालुक्याचा समावेश असलेल्या बाजार परिसरात अनुक्रमे 97 आणि 74 ग्रामपंचायती आहेत. त्यातील 75 पैकी 58 ग्रामपंचायतींच्या निवडणुकांना राज्य निवडणूक आयोगाने 23 नोव्हेंबर 2012 रोजी स्थगिती दिली आहे. आजपर्यंत या निवडणुका झालेल्या नाहीत, मोहाडी तहसीलमधील पन्नास टक्क्यांहून अधिक ग्रामपंचायतींना बाजार समितीत प्रतिनिधित्व मिळण्यापासून वंचित राहावे लागणार होते. हा मुद्दा उपस्थित करुन याचिकाकर्ते माजी सरपंच सदाशिव ढेंगे यांनी उच्च न्यायालयाच्या नागपूर खंडपीठाकडे रिट याचिका दाखल केली होती. दरम्यान तुमसर बाजार समिती निवडणूक प्रक्रियेला स्थगिती दिली गेली असल्याचं सदाशिव ढेंगे, माजी सरपंच (याचिकाकर्ता) यांनी सांगितले.
