24 डिसेंबर रोजी संजय राऊत तुरुंगात जाणार?; नितेश राणे यांचा सर्वात मोठा दावा काय?
भाजपा नेते नितेश राणे यांनी शिवसेना खासदार संजय राऊत यांच्यावर टिका केली आहे. त्यांनी संजय राऊत यांना येत्या 24 डिसेंंबर रोजी अटक होणार असल्याचा दावा केला आहे. तसेच इंडीया आघाडीतील बिहारचे मुख्यमंत्री नितीश कुमार यांनी महिलांबद्दल काढलेल्या वक्तव्याचा निषेध उद्धव ठाकरे करणार की नाही असा सवाल केला आहे.
मुंबई | 9 नोव्हेंबर 2023 : महायुती सरकारमध्ये काही गॅंगवॉर वगैरे नाही. माझ्या माहितीनूसार सर्वकाही आलबेल आहे. परंतू संजय राऊतांच्या आरोपात काही तथ्य नाही. बिहारचे मुख्यमंत्री नितीश कुमार यांनी महिलांबद्दल जे गलिच्छ विचार मांडले आहेत. त्यावर एक मुख्यमंत्री असा कसा बोलू शकतो म्हणून देशभरात टिका होत आहे. यावर उद्धव ठाकरे यांनी काहीही प्रतिक्रीया दिलेली नाही. सनातन धर्मावर टिका झाली तरी त्यांनी काही म्हटलेलं नाही. संजय राऊतांकडून गलिच्छ मानसिकतेचं प्रदर्शन झाले असून त्यांना 24 डिसेंबर रोजी अटक होणार असल्याचा खळबळजनक दावा भाजपा नेते नितेश राणे यांनी केला आहे.
ज्या इंडिया अलायन्समध्ये उद्धव ठाकरे यांच्या पक्ष आहे. त्यांचे मित्र नितीश कुमार महिलांबद्दल अनुद्गार काढत आहेत. तरी उद्धव ठाकरे त्यावर काही बोलायला तयार नाहीत अशी टिका भाजपा नेते नितेश राणे यांनी केली आहे. ते पुढे म्हणाले की सनातन धर्मावर स्टॅलिन यांनी टिका केली तरी ठाकरे काही बोलले नाहीत. संजय राऊत गलिच्छ मानसिकतेचे प्रदर्शन करीत आहेत. महिलांबद्दल अपमान होऊनही यावर काही बोलत नाहीत, स्वप्ना पाटकर यांच्या घरावर रात्री एक वाजता बाटल्या फेकल्याची बातमी आली आहे. कोण स्वप्ना पाटकर ? ज्यांना शिव्या देताना संजय राऊत यांची क्लिप व्हायरल झाली होती. सुजित पाटकरला अटक झाली तो राऊत यांचा भागीदार आहे. आता ते म्हणणार का माझा काही संबंध नाही. पण आपण स्वत: स्वप्ना पाटकर यांनी भेटणार असून त्यांना कोण धमकावतंय ते विचारणार असल्याचे नितेश राणे यांनी म्हटले आहे.
स्वप्ना पाटकर यांच्या कुटुंबाला भेटणार
नितेश राणे पुढे म्हणाले की स्वप्ना पाटकर यांच्या घरात भीतीचं वातावरण आहे. मी त्या महिलेच्या कुटुंबाला भेटणार आहे. कुणी त्या महिलेला धमकावत असेल तर त्या व्यक्तीला आम्ही सोडणार नाही. दिशा सालियन आणि सुशांत प्रकरणातही केस चालू आहे. आदित्य ठाकरे आणि रिया यांचे चॅटींग आहे, अशी माहीती याचिकाकर्ते यांनी दिली आहे. उद्धव ठाकरे यांनी याचिकाकर्त्याला 50 खोक्यांची ऑफर दिली आहे. ही माहीती खोटी असेल तर आमच्यावर अब्रु्नुकसानीचा दावा टाका असेही नितेश राणे यांनी पत्रकार परिषदेत सांगितले. मराठा नेते मनोज जरांगे पाटील यांनी राज्यभरात दौरा काढणार असतील तर चांगलेच आहे. परंतू त्यांना हे ब्रह्मास्र काढण्याची वेळ येणार नसल्याचा दावाही नितेश राणे यांनी यावेळी केला.
