तो पुरावा द्या, नाहीतर मतीन पटेलचं घर जमीनदोस्त होणार…; शिवसेना नेत्याचा इशारा

नाशिक येथील एका नामांकित आयटी कंपनीत समोर आलेल्या धर्मांतर प्रकरणाने संपूर्ण राज्य हादरवून सोडले आहे. या प्रकरणाचे धागेदोरे आता छत्रपती संभाजीनगरपर्यंत पोहचले असून राजकीय वातावरण कमालीचे तापले आहे. या प्रकरणात अटक करण्यात आलेल्या आरोपींना आश्रय देणाऱ्या मतीन पटेल याच्या घरावर आता प्रशासकीय कारवाईची टांगती तलवार आहे. देशद्रोही कारवाया करणाऱ्यांना शहरात थारा मिळणार नाही. मतीन पटेलने नोटीशीला योग्य उत्तर दिले नाही, तर त्याच्या घरावर १०० टक्के बुलडोझर चालणार, असा निर्वाणीचा इशारा शिवसेना जिल्हाप्रमुख आणि उपमहापौर राजेंद्र जंजाळ यांनी दिला आहे.

नेमकं प्रकरण काय?

नाशिकमधील एका आयटी सॉफ्टवेअर कंपनीत काम करणाऱ्या हिंदू तरुण-तरुणींना प्रलोभने देऊन किंवा मानसिक दबाव टाकून त्यांचे धर्मांतर केले जात असल्याचा प्रकार काही दिवसांपूर्वी उघडकीस आला होता. या प्रकरणात निदा खान ही मुख्य आरोपी म्हणून समोर आली. तपासादरम्यान नाशिक पोलिसांनी छत्रपती संभाजीनगरमधून निदा खानला ताब्यात घेतले. धक्कादायक बाब म्हणजे, निदा खानला शहरात मतीन पटेल नामक व्यक्तीने आश्रय दिला होता. यावरून आता शहरातील हिंदुत्ववादी संघटना आणि स्थानिक नेते आक्रमक झाले आहेत.

एमआयएमवर थेट निशाणा

राजेंद्र जंजाळ यांनी या संपूर्ण प्रकरणामागे एका विशिष्ट राजकीय विचारसरणीचा हात असल्याचा आरोप केला आहे. हे केवळ धर्मांतर नसून एक मोठे षडयंत्र आहे. सक्तीने आणि आमिष दाखवून केले जाणारे हे धर्मांतर एमआयएम (MIM) पक्षाच्या पाठिंब्याशिवाय शक्य नाही. एमआयएमचे नेते इम्तियाज जलील असोत वा अन्य कोणी, जे या प्रकरणाशी प्रत्यक्ष किंवा अप्रत्यक्षपणे संबंधित आहेत, त्या सर्वांची सखोल चौकशी होऊन त्यांच्यावर देशद्रोहाचा गुन्हा दाखल व्हायला हवा, असे राजेंद्र जंजाळ यांनी म्हटले.

प्रशासकीय नोटीस आणि बुलडोझरची चर्चा

मतीन पटेल याने गुन्हेगाराला आश्रय दिल्याने त्याचे घर आता रडारवर आले आहे. महानगरपालिका किंवा संबंधित प्रशासकीय विभागाने त्याच्या मालमत्तेच्या वैधतेबाबत नोटीस बजावली आहे. यावर बोलताना जंजाळ यांनी स्पष्ट केले की, कायद्याचे उल्लंघन करणाऱ्यांना धडा शिकवण्यासाठी प्रशासन सज्ज आहे. जर मतीन पटेलने समाधानकारक कागदपत्रे सादर केली नाहीत, तर उत्तर प्रदेशच्या धर्तीवर येथेही बेकायदेशीर बांधकामावर बुलडोझर फिरवला जाईल.

शहरात कडक बंदोबस्त

या प्रकरणाच्या संवेदनशीलतेमुळे छत्रपती संभाजीनगरमध्ये ठिकठिकाणी पोलीस बंदोबस्त वाढवण्यात आला आहे. नाशिक पोलीस आणि स्थानिक गुन्हे शाखा या प्रकरणाचा संयुक्त तपास करत असून, आणखी काही मोठे खुलासे होण्याची शक्यता वर्तवली जात आहे.