अजित पवार यांच्या विमान अपघाताबाबत सीआयडीची महत्त्वाची पत्रकार परिषद, तपासासंदर्भात मोठा खुलासा

28 जानेवारी रोजी अजित पवार यांच्या विमानाचा भीषण अपघात झाला, या अपघातामध्ये अजित पवार यांचं निधन झालं. अजित पवार हे मुंबईवरून बारामतीला येण्यासाठी निघाले होते. परंतु विमान बारामती विमानतळाच्या धावपट्टीवर उतरत असतानाच हा अपघात झाला. विमान थेट जमिनिला धडकलं. जमिनिला धडकल्यानंतर विमानाला भीषण आग लागली, मोठी स्फोट झाला. या अपघाताबद्दल राष्ट्रवादी शरद पवार गटाचे आमदार रोहित पवार हे सातत्याने शंका उपस्थित करत आहेत. अजूनही या प्रकरणात पोलिसांनी एफआयआर का दाखल करुन घेतला नाही? असा सवाल त्यांनी आज पत्रकार परिषद घेऊन केला. यावेळी ते चांगलेच आक्रमक झाले. दरम्यान त्यानंतर आता या सर्व प्रकरणावर सीआयडीची महत्त्वाची पत्रकार परिषद पार पडली.

सध्या अजित पवार यांच्या विमान अपघात प्रकरणाचा तपास सीआयडी करत आहे. दरम्यान आज पुण्यामध्ये सीआयडीची पत्रकार परिषद पार पडली. अजितदादांचा घातपात आहे का? हा तपासाचा उद्देश असल्याचं सीआयडीने यावेळी स्पष्ट केलं आहे. घातपात, निष्काळजीपणा आणि गुन्हेगारी कृत्याच्या दृष्टीने या प्रकरणाचा तपास सुरू असल्याचंही यावेळी सीआयडीने म्हटलं आहे .

अजितदादांच्या विमान अपघाताचा तपास योग्य दिशेनं सुरु आहे. अतिशय प्रोफ्रेशनल पद्धतीनं सीआयडी तपास करत आहे. केंद्रातल्या अनेक संस्था तपासात सहकार्य करत आहेत. एएआयबीशी सीआयडीचा सातत्यानं समन्वय सुरू आहे. एएआयबीचा तपास संपल्यानंतर त्यांच्या अहवालाचा निष्कर्ष सीआयडी तपासादरम्यान लक्षात घेणार आहे. महाराष्ट्र सरकारनं तपास सीबीआयकडे वर्ग करण्यासाठी पत्रव्यवहार केला आहे. जर घातपात, निष्काळजीपणा, गुन्हेगारी कृत्य निष्पन्न झाल्यास सीआयडी योग्य कलमांखाली गुन्हा दाखल करेल, अशी माहिती यावेळी सीआयडीकडून देण्यात आली.

दरम्यान  VSR कंपनीवर DGCA कडून कारवाई झाली आहे, तुमच्या तपासात या कंपनीकडून हलगर्जीपणा झाल्याचं आढळून आल आहे का? असा सवालही यावेळी करण्यात आला. याला उत्तर देताना सीआयडीच्या अधिकाऱ्यांनी म्हटलं की,  तांत्रिक तपास हा वेगळा भाग आहे आणि आमचा सीआयडीचा तपास हा आकस्मिक मृत्यूबद्दल आहे.  आमच्या तपासात काही पुरावे मिळाले आहेत.  AAIB चा अहवाल आला की तो आमच्या तपासात समाविष्ट केला जाईल, अशी माहिती यावेळी देण्यात आली आहे.