विजय वडेट्टीवार यांचं एक्स अकाऊंट हॅक; तातडीने नागरिकांना केलं आवाहन

काँग्रेसचे ज्येष्ठ नेते आणि महाराष्ट्रातील विधानसभेतील काँग्रेसचे नेते विजय वडेट्टीवार यांचं अधिकृत X (ट्विटर) अकाऊंट हॅक झाल्याची माहिती समोर आली आहे. वडेट्टीवार यांनी स्वतःच याबाबत लोकांना सतर्क केलं असून, अकाऊंट पुन्हा सुरक्षितपणे रिकव्हर होईपर्यंत त्यावरून होणाऱ्या कोणत्याही हालचालींशी आपला किंवा आपल्या कार्यालयाचा संबंध नसल्याचं स्पष्ट केलं आहे. विजय वडेट्टीवार यांच्या सोशल मीडिया अकाऊंटला मोठ्या संख्येने फॉलोअर्स आहेत. त्यामुळे एखाद्या महत्त्वाच्या राजकीय व्यक्तीचं अकाउंट हॅक झाल्यानंतर त्याचा गैरवापर होण्याची शक्यता लक्षात घेता, नागरिक आणि कार्यकर्त्यांना सावध राहण्याचं आवाहन करण्यात आलं आहे. विशेषतः हॅक झालेल्या अकाऊंटवरून येणाऱ्या संशयास्पद पोस्ट, मेसेज किंवा लिंकवर क्लिक न करण्याचा सल्ला देण्यात आला आहे.

‘पोस्ट किंवा मेसेजशी माझा संबंध नाही’

वडेट्टीवार यांनी अकाउंट हॅक झाल्याची माहिती देताना, सध्या त्यांच्या X हँडलवरून होणाऱ्या कोणत्याही पोस्ट, मेसेज किंवा इतर कृतीशी त्यांचा अथवा त्यांच्या कार्यालयाचा संबंध नसल्याचं सांगितलं आहे. त्यामुळे त्यांच्या नावाने एखादी नवी पोस्ट किंवा मेसेज दिसल्यास तो अधिकृत आहे की नाही, याची खात्री केल्याशिवाय त्यावर प्रतिक्रिया देऊ नये, असं आवाहन करण्यात आलं आहे. यासंदर्भात त्यांनी इन्स्टाग्रामवर पोस्ट लिहिली आहे.

View this post on Instagram

A post shared by Vijay Wadettiwar (@vijay.wadettiwar)

‘महत्त्वाची सूचना.. माझं ट्विटर/ एक्स अकाऊंट हॅक झालं आहे. सध्या या अकाऊंटवरून होणाऱ्या कोणत्याही पोस्ट, मेसेज किंवा इतर कृतीशी माझा कोणताही संबंध नाही. कृपया या अकाऊंटवरून येणाऱ्या कोणत्याही लिंक, मेसेज किंवा पोस्टवर विश्वास ठेवू नये आणि त्यावर कोणतीही प्रतिक्रिया देऊ नये. अकाऊंट सुरक्षितपणे पुन्हा माझ्या ताब्यात येईपर्यंत सर्वांनी सहकार्य करावं,’ असं त्यांनी पोस्टमध्ये स्पष्ट केलं आहे.

या घटनेच्या पार्श्वभूमीवर सोशल मीडिया अकाउंटच्या सुरक्षेचा मुद्दाही पुन्हा चर्चेत आला आहे. विशेषतः प्रसिद्ध व्यक्ती, राजकीय नेते आणि मोठ्या प्रमाणावर फॉलोअर्स असलेली अकाऊंट्स हॅकर्सच्या निशाण्यावर येत असल्याच्या घटना अलीकडे समोर आल्या आहेत.