डोंबिवली डॉक्टर मारहाण प्रकरणात ट्विस्ट; आधी म्हात्रेंचा जामीन रद्द केला, नंतर सीसीटीव्हीत दिसणाऱ्या 5 व्या महिला आरोपीला अटक

मुंबई हायकोर्टाच्या दणक्यानंतर डोंबिवली डॉक्टर मारहाण प्रकरणात मोठी कारवाई केली आहे. नगरसेवक रमेश म्हात्रे यांच्यासह 4 जणांचा जामीन रद्द करण्यात आला आहे. त्यानंतर या प्रकरणात मारहाणीवेळी सीसीटीव्हीत दिसणाऱ्या पाचव्या महिला आरोपीला अटक करण्यात आली आहे. या प्रकरणातील पाचवी आरोपी साधना कारंडे हिला अटक करण्यात आली आहे. साधनाला आज कोर्टात हजर केले जाणार आहे. त्यानंतर तिच्यावर पुढील कारवाई केली जाण्याची शक्यता आहे.

मिळाल्या माहितीनुसार, शास्त्रीनगर रुग्णालयात उपचार घेत असलेल्या प्रियांका उधमाळेची आई साधना कारंडे हिला शनिनारी रात्री पोलिसांनी अटक केल्याची माहिती सूत्रांनी दिली. या मारहाणीच्या घटनेतील सीसीटीव्ही फुटेजमध्ये साधना कारंडे दिसत असल्याने तिच्यावर देखील गुन्हा दाखल करण्यात आलाय. यापूर्वी तिला नोटीस बजावण्यात आली होती. मात्र मुलीवर रुग्णालयात उपचार सुरू असल्याने अटकेची कारवाई थांबवण्यात आली होती. मात्र हायकोर्टाच्या हस्तक्षेपानंतर पोलिसांनी तिला राहत्या घरातून ताब्यात घेतले.

प्रियांकाला रुग्णालयातून डिस्चार्ज मिळाल्यानंतर साधना कारंडे हिला आज रविवारी न्यायालयात हजर केले जाणार आहे. डॉक्टर-नर्स मारहाण प्रकरणात हायकोर्टाच्या कठोर भूमिकेमुळे तपासाला वेग आला आहे. आता आरोपींवरील कारवाई अधिक तीव्र होण्याची शक्यता आहे. दुसरीकडे साधना कारंडे हिला रविवारी कोर्टात हजर केल्यानंतर तिच्यावर पुढील कारवाई काय केली जाणार, याकडे साऱ्यांचं लक्ष लागलं आहे. दुसरीकडे जामिनावर बाहेर असलेले रमेश म्हात्रे सायंकाळी ५ वाजेपर्यंत आत्मसमर्पण करतात की पोलिसांना त्यांचा शोध घ्यावा लागतो, याकडे संपूर्ण राज्याचे लक्ष लागले आहे.

दरम्यान,  नगरसेवक रमेश म्हात्रे यांचा मुलगाही एका फसवणूक प्रकरणात फरार आहे. नगरसेवक रमेश म्हात्रेंच्या मुलाच्या अटकेसाठी तक्रारदाराचे कल्याणमध्ये बेमुदत उपोषण पुकारलं आहे. आता या दोन्ही प्रकरणात पोलीस काय कारवाई करतात, हे पाहावे लागेल. त्यात कल्याणचे खासदार श्रीकांत शिंदे यांनी कोर्टाच्या निर्णयावर भाष्य केलं. ‘डॉक्टर मारहाण प्रकरणातील कोर्टाच्या निर्णयाचे स्वागत करतो. खरंतर आम्ही आधीच भूमिका स्पष्ट केली आहे, असे खासदार श्रीकांत शिंदे म्हणाले.