शिंदे सरकारचं ठरलं! धनगर आरक्षणाबाबतची मोठी बातमी, सह्याद्री अतिथीगृहावरील बैठकीतली आतली बातमी
धनगर आरक्षणाबाबत मोठी बातमी समोर येत आहे. धनगर समजाला एसटीमधून आरक्षण मिळावे या मागणीसाठी आंदोलकांकडून उपोषण सुरु आहे. या आंदोलनाची दखल घेत मुख्यमंत्री एकनाथ शिंदे यांनी आज सह्याद्री अतिथीगृहावर आंदोलकांच्या शिष्टमंडळाची बैठक घेतली. या बैठकीत महत्त्वाचा निर्णय घेण्यात आला.
धनगर समाजाला सध्या एनटी संवर्गातून आरक्षण मिळत आहे. पण देशभरात धनगर समाजाला एसटीमधून आरक्षण मिळत आहे. त्यामुळे महाराष्ट्रातील धनगर समाजाला एसटीतून आरक्षण मिळावं यासाठी पंढरपुरात काही आंदोलक उपोषणाला बसले आहेत. त्यांच्या उपोषणाच्या पार्श्वभूमीवर मुख्यमंत्री एकनाथ शिंदे यांनी आज सह्याद्री अतिथीगृहावर सकल धनगर समाजाच्या शिष्टमंडळासोबत बैठक घेतली. या बैठकीला मंत्री शंभूराज देसाई हे देखील उपस्थित होते. या बैठकीत धनगर आरक्षणासाठी एक मोठा निर्णय घेण्यात आला. त्यामुळे आगामी काळात धनगर समाजाच्या मागण्या पूर्ण होण्याची शक्यता आहे. कारण राज्य सरकारने त्या दृष्टीने महत्त्वाचं पाऊल ठेवलं आहे. मंत्री शंभूराज देसाई यांनी ‘सह्याद्री’वरील बैठक संपल्यानंतर माध्यमांना प्रतिक्रिया दिली. यावेळी त्यांनी बैठकीत काय ठरलं? याबाबतची माहिती दिली.
“पंढरपुरात उपोषणाला बसलेल्या धनगर समाजाच्या आंदोलकांच्या भेटीसाठी मी आणि मंत्री चंद्रकांत पाटील गेलो होतो. आज सुट्टीचा दिवस असतानाही सर्व सिनियर अधिकाऱ्यांची मुख्यमंत्री एकनाथ शिंदे यांच्या अध्यक्षतेखाली बैठक पार पडली”, असं मंत्री शंभूराज देसाई म्हणाले. यानंतर बैठकीत नेमकं काय ठरलं? याबाबतची माहिती शंभूराज देसाई यांनी दिली. तसेच आपण याबाबत धनगर समाजाच्या शिष्ठमंडळातील पदाधिकाऱ्यांसोबत बोलूनही माहिती घेऊ शकता, असं शंभूराज देसाई यांनी सांगितलं.
धनगर आरक्षणासाठी सरकारचं काय ठरलं?
“सकल धनगर समाजाच्या शिष्टमंडळाची मागणी होती की, धनगर आणि धनखड हे एकच आहेत, अशा पद्धतीचा स्वतंत्र जीआर सरकारने काढावा. तो जीआर कशापद्धतीचा असावा, यासाठी तीन वरिष्ठ आयएएस अधिकाऱ्यांची, तसेच त्या समितीबरोबर सकल धनगर समाजाचे जे प्रतिनिधी आज आले होते, त्यापैकी पाच प्रतिनिधी यांची समिती स्थापन करुन त्यांनी हा जीआरचा मसुदा कसा असावा, जीआर काढला तर तो कोर्टात टीकला पाहिजे, या बाबतीत ती समिती लगेचच चार दिवशात बसेल आणि जीआरचा ड्राफ्ट तयार करतील. अॅडव्होकेट जनरल साहेबांचं त्यावर मत घेतलं जाईल आणि पुढची कार्यवाही सकारात्मक करण्याचा निर्णय आजच्या बैठकीत झाला”, अशी माहिती शंभूराज देसाई यांनी यावेळी दिली.
“जे उपोषणकर्ते पंढरपुरात बसले आहेत, त्यांना राज्य सरकारने विनंती केली आहे की, त्यांनी उपोषण स्थगित करावं. त्यासाठी आम्ही विभागीय आयुक्तांना पाठवलं आहे. आम्ही उपोषणाला बसले आहेत त्यांच्याशी तातडीने चर्चा करु आणि त्यांना उपोषण मागे घेण्याची विनंती करु. सरकारने सकारात्मक निर्णय घेतला आहे. तसेच धनगर समाजाच्या बहुतांश मागण्यांबाबत सकारात्मक निर्णय घेतला आहे. सरकारने सकारात्मक आश्वासन दिलं आहे”, अशी प्रतिक्रिया शंभूराज देसाई यांनी दिली.
