महायुतीमधील अंतर्गत वाद पुन्हा चव्हाट्यावर, शिवसेना नेत्याच्या मनात खदखद, गोगावले बीडच्या दौऱ्यावर असताना नेमकं काय घडलं?

राजकीय वर्तुळातून मोठी बातमी समोर येत आहे. पुन्हा एकदा महायुतीमधील अंतर्गत वाद चव्हाट्यावर आला आहे. शिवसेना शिंदे गटाचे नेते आणि मंत्री भरत गोगावले हे बीड जिल्ह्याच्या दौऱ्यावर आहेत. यावेळी गेवराई शहरात आयोजित पक्षाच्या बैठकीमध्ये बीडचे गेवराई विभाग जिल्हाप्रमुख चंद्रकांत नवले यांनी गोगवले यांच्याकडे राष्ट्रवादीची तक्रार केली आहे. इथे राष्ट्रवादी अजित पवार गटाचे आमदार विजय पंडित आहेत. त्यामुळे न्याय मिळत नाही, असं यावेळी चंद्रकांत नवले यांनी म्हटलं आहे. मात्र जरी असं असलं तरी देखील आपण पक्षवाढीसाठी काम करणार आहोत आणि मरेपर्यंत आपण शिवसेनेतच राहू असंही ते यावेळी म्हणाले.

गोगावले यांनी यावेळी चंद्रकांत नवले यांची तक्रार ऐकून घेतली आहे. यावर प्रतिक्रिया देताना ते म्हणाले की,   हरकत नाही आपला आमदार नाही. जिथे आपला आमदार नाही तिथे काय अडचणी येतात हे आम्हाला माहिती आहे. तुम्हाला ताकद देण्यासाठीच मी इथे आलो आहे. आपल्याला संघटनेला मोठं करण्यासाठी काम करायचं आहे, असा यावर गोगावले यांनी म्हटलं आहे.

दरम्यान अजूनही रायगडच्या पालकमंत्रिपदाचा तिढा कायम आहे. रायगडच्या पालकमंत्रिपदासाठी शिवसेना आणि राष्ट्रवादी अजित पवार गटामध्ये रस्सीखेच सुरू असल्याचं पहायला मिळत आहे. रायगडच्या पालकमंत्रिपदासाठी शिवसेना शिंदे गटाच्या वतीने भरत गोगावले हे उत्सुक आहेत. तर दुसरीकडे राष्ट्रवादी अजित पवार गटाच्या वतीने मंत्री आदिती तटकरे या देखील उत्सुक आहेत. यावर प्रसारमाध्यमांशी बोलताना आता भरत गोगावले यांनी सूचक वक्तव्य केलं आहे.

आमचे नेते एकनाथ शिंदे व मुख्यमंत्री देवेंद्र फडणवीस यांच्यामध्ये चर्चा झाली आहे. त्यातून नक्कीच सकारात्मक निर्णय होईल. पावणे दोन वर्षे थांबलो आहे, सब्र का फल मीठा होता है आणि हे फळ भरतशेठलाच मिळणार असल्याचं त्यांनी यावेळी सांगितले आहे. तटकरे यांच्या पुतण्याला आता आमदारकी मिळाली आहे. त्यामुळे पालकमंत्री पदाचा आमचा मार्ग मोकळा झाला असल्याचे देखील भरत गोगावले यांनी म्हटले असून, 15 ऑगस्ट झेंडा देखील मीच फडकवणार असल्याचे त्यांनी यावेळी सांगितले.