Navnath Waghmare: तो तर मनोज जरांगे यांचा पाळलेला… खासदार बजरंग सोनवणे यांच्यावर टीका करताना नवनाथ वाघमारे यांचा तोल सुटला
Navnath Waghmare on Bajrang Sonawane : मस्साजोगचे सरपंच संतोष देशमुख हत्या प्रकरणात धनंजय मुंडे यांनाच अटक केली पाहिजे हेच यांचं टार्गेट होतं, असा हल्लाबोल नवनाथ वाघमारे यांनी बजरंग सोनवणे यांच्यावर केला.
बीडचे राष्ट्रवादीचे खासदार बजरंग सोनवणे यांनी संतोष देशमुख हत्याप्रकरणातील मुख्य आरोपी वाल्मिक कराड यांच्यावर मोठा आरोप केला आहे. बीड जिल्ह्यातील विलास घुले खून प्रकरणात आपल्या मुलाला नाहक गोवण्यात येत असल्याचा आरोप त्यांनी केला. त्याचवेळी त्यांनी काही जणांकडे अंगुली निर्देश करत आरोपांची राळ उडवून दिली. त्यांच्या आरोपानंतर आता ओबीसी नेते नवनाथ वाघमारे यांनी बजरंग सोनवणे यांच्यावर जहरी टीका केली आहे.
वाघमारे यांचा सोनवणे यांच्यावर हल्लाबोल
विलास घुले हत्या प्रकरणाच्या अनुषंगाने बीडचे खासदार बजरंग सोनवणे यांनी जाहीर पत्रकार परिषद घेऊन ओबीसी नेते नवनाथ वाघमारे यांच्यासह इतर सहकाऱ्यांवर आरोप केलाय, त्या आरोपावर नवनाथ वाघमारे यांनी खासदार बजरंग सोनवणे यांच्यावर चांगलाच पलटवार केला.500 काय 5 हजार कोटीचा दावा ठोक काय फरक पडतो? तुला किडन्या विकून देऊ असं नवनाथ वाघमारे यांनी म्हटलंय.इतकच नाही तर बजरंग सोनवणे हा मनोज जरांगे यांनी पाळलेला असून पुढचा पराभव दिसत असल्याने उलटी-सुल्टी वक्तव्य करून सहानुभूती मिळवण्याचा प्रयत्न करत असल्याच देखील त्यांनी म्हटलं आहे. दरम्यान संतोष देशमुख हत्या प्रकरणात धनंजय मुंडे यांना अटक केली पाहिजे हेच टार्गेट यांचं होतं असं म्हणत बजरंग सोनवणे यांच्यावर हल्लाबोल केला आहे.
बजरंग सोनवणे यांचा आरोप काय?
बीडमधील विलास घुले हत्याप्रकरणात राजकीय वातावरण पुन्हा तापलं. काल पत्रकार परिषद घेत खासदार बजरंग सोनवणे यांनी गंभीर आरोप केले. वाल्मिक कराड याने तुरूंगातून आपल्या मुलाला अडकवण्याचा कट रचल्याचा गंभीर आरोप त्यांनी केला. त्यांनी एक ऑडिओ क्लिपही माध्यमांना ऐकवली. तर धनंजय मुंडे यांच्यासाठी आपण दिवंगत लोकनेते गोपीनाथ मुंडे यांचे पाय धरल्याचेही सांगितले. या पत्रकार परिषदेतून त्यांनी काही ओबीसी नेत्यांवरही निशाणा साधला.
दरम्यान काल धनंजय मुंडे यांनी मुख्यमंत्री देवेंद्र फडणवीस यांची भेट घेतल्याने चर्चांना ऊत आला होता. पण दुष्काळी परिस्थिती, शेतकऱ्यांसाठी मदतीची मागणी करण्यासाठी ही भेट घेतल्याचे समोर आले. नुकसानीचे पंचनामे होऊन शेतकऱ्यांना मदत मिळायला काही कालावधी लागेल. तोपर्यंत केंद्र सरकारच्या पीएम किसान योजना आणि इतर योजनांच्या माध्यमातून तातडीने मदत करण्याची मागणी त्यांनी केली.
