MPSC चा पेपर 12 लाखांत फोडला? रोहित पवारांच्या आरोपांना कौटिल्य अकॅडमीच्या संचालकाचं एका वाक्यात उत्तर

एमपीएससीचा औषध निरीक्षक पदाचा पेपर फुटल्याचा खळबळजनक दावा रोहित पवार यांनी केला आहे. पेपर सेट करणाऱ्याने हा पेपर फोडल्याचा दावा रोहित पवारांनी केला आहे. 12 लाखांत पेपरची विक्री झाल्याचे सांगण्यात येत आहे. एका नायब तहसीलदाराच्या मुलांना परीक्षेनंतर सारखेच गुण मिळाले आहेत. त्यामुळे पेपरसाठी अॅडव्हान्सही दिल्याचा दावा करण्यात येत आहे. औषध निरीक्षक पदाचा हा पेपर कौटिरल्य अकॅडमीचे संचालक प्रवीण पाटील यांनी फोडल्याचा आरोप करण्यात आला आहे. परंतु रोहित पवारांचा आरोप फेटाळून चौकशीसाठी सामोरे जाण्यास तयार असल्याचं संचालक प्रवीण पाटील यांनी म्हटलं आहे .

मिळालेल्या माहितीनुसार, औषध निरीक्षक पदाचा पेपर २२ मार्च रोजी होणार होता. मात्र तो २० मार्च रोजीच फुटल्याचा आरोप करण्यात आला आहे. या परीक्षेत एका तहसीलदाराच्या मुलाला १३ वा, तर मुलीला १६ वा क्रमांक मिळाल्याचाही दावा करण्यात आला आहे. मात्र हे सर्व आरोप कौटिल्य अकॅडमीचे संचालक प्रवीण पाटील यांनी फेटाळून लावले आहेत. NEET पेपरप्रकरणानंतर आता औषधनिर्माण शास्त्राचा पेपरही फुटल्याच्या दाव्याने खळबळ उडाली आहे. महाराष्ट्रातील पेपरफुटीचे धागेदोरे नंदुरबारशी जोडले जात असल्याचा आरोप रोहित पवार यांनी केला, मात्र कौटिल्य अकॅडमीच्या संचालकांनी हे सर्व आरोप स्पष्टपणे फेटाळले आहेत.

कौटिल्य अकॅडमी संचालक प्रवीण पाटील यांनी म्हटलं की, ‘मी कोणत्याही प्रकारचा गुन्हा केलेला नाही. एमपीएससीचा पेपर फुटतो, हे कधीही ऐकलेले नाही. ज्या घटना घडल्या आहेत, त्याविषयी माहिती नाही. संबंधित व्यक्ती माझ्याकडे अभ्यासाकडे यायच्या. विचारपूस करायच्या. मुलाखतीची तयारी कशी करायची, याची विचारपूस केली आहे. त्यांनी जवळपास 10 ते 15 वेळा विचारपूस केली आहे. व्हॉट्सअॅप चॅट आणि रेकॉर्डिंग चुकीच्या पद्धतीने करण्यात आलं आहे. मी चौकशीसाठी समोर जायला तयार आहे. मी गुन्हा केलेला नाही. त्यामुळे कोणता पैसा घ्यायचा संबंधच येत नाही. असं केलंच नाही, तर त्यावर काहीच बोलू शकत नाही. तो आरोप चुकीचा आहे. मी फार थोडी फी घेतो. विद्यार्थ्यांकडून 10 ते 12 हजार इतकी फी घेतो. माझा क्लास हा भाड्याच्या खोलीत चालतो. माझ्यावरील आरोप चुकीचे आहेत’.