ठो ठो आवाजाने कुर्ला हादरलं.. ऐन वर्दळीच्या ठिकाणी रात्री गोळीबार, प्रचंड घबराट, एकजण…
मुंबईतील कुर्ला येथे बुधवारी रात्री थरारक गोळीबार झाला. बाबा एलप्पा पवार या गुन्हेगारी पार्श्वभूमीच्या व्यक्तीला गोळ्या घालून गंभीर जखमी करण्यात आले. त्याला भाभा रुग्णालयात दाखल केले असून प्रकृती चिंताजनक आहे. पोलिसांनी दोन संशयितांना ताब्यात घेतले असून गँगवॉरच्या दिशेने तपास सुरु आहे. परिसरातील नागरिकांमध्ये भीतीचे वातावरण आहे.
कुर्ला… मुंबईतील इतर शहरांप्रमाणेच हेह गजबजलेलं शहर. मात्र बुधवारी रात्री तिथे अचानक अशी अघटित घटना घडली की परिसरातील सगळेच नागरिक घाबरले, हैराण झाले आणि गोंधळाचं वातावरण निर्माण झालं. कुर्ला पश्चिम येथील हलाव पुलाजवळ बुधवारी रात्री एका इसमावर गोळीबार करण्यात आला आणि एकच गदारोळ माजला. बाबा एलप्पा पवार नावाच्या इसमावर गोळीबार झाला असून तो गंभीर जखमी झाल्याचे समजते. त्याला उपचारांसाठी कुर्ला येथील भाभा रुग्णालयात दाखल करण्यात आलं आहे. सध्या त्याच्यावर उपचार असून त्यांची प्रकृती मात्र ” क्रिटिकल ” असल्याची माहिती समोर आली आहे.
रात्रीच्या सुमारास गोळीबार
बुधवारी रात्री 8.30 वाजताच्या सुमारास झालेल्या गोळीबाराच्या या घटनेनंतर वरिष्ठ पोलिस अधिकारी तसेच फॉरेन्सिक टीम घटनास्थळी पोहोचली. तपासासाठी फॉरेन्सिक टीमने पचनामा करून सॅम्पल्स घेतले असून पुढील तपासासाठी ते पाठवण्यात आलं आहे. स्थानिक डीसीपी आणि इतर पोलीस टीम रात्री उशिरा घटनास्थळी आणि रुग्णालयात होती. या घटनेसंदर्भात कुर्ल्याच्या वी बी नगर पोलीस ठाण्यात गुन्हा दाखल करण्यात आला आहे.
जखमी व्यक्ती बाबा पवार याची गुन्हेगारी पार्श्वभूमी असल्याचंही समोर आलं आहे. त्यामुळे त्याच्यावर जो गोळीबार झाला तो आपापसातील वादामुळ झाला की हे गँगवॉर आहे, या अनुषंगाने पोलिसांकडून सखोल चौकशी सुरू आहे.याप्रकरणी पोलिसांनी गुन्हा दाखल केला आहे. तसेच गोळीबारासंबंधी पोलिसांनी दोन व्यक्तींना, दोन आरोपींना पोलिसांनी ताब्यात घेतल असून त्यांची कसून चौकशी सुरू आहे. हे प्रकरण नेमकं काय आहे, गोळीबार का करण्यात आला याचा पोलिस लवकरच छडा लावतीलं असं सांगण्यात आलं.
