‘रोहित पवार लबाड लांडगा…मुख्यमंत्र्यांजवळ…’;उजनी रक्षण आंदोलनावरून भाजप आमदारांची जहरी टीका

उजनी जलाशयात उभारणाऱ्या एआय डेटा सेंटरवरून सोलापुरात दोन गट पडले आहेत. एका आंदोलनात आमदार रोहित पवारांनी उडी घेतली आहे. दर एआय डेटा सेंटरच्या समर्थनार्थ भाजपने नारा दिला. सोलापुरात एआय डेटा समर्थनार्थ आंदोलनाची धुरा आमदार सचिन कल्याणशेट्टी, आमदार देवेंद्र कोठे यांनी हाती घेतली आहे. या आंदोलनात आमदार रोहित पवार यांच्या विरोधात घोषणाबाजी करण्यात आली. या आंदोलनावेळी भाजप आमदार देवेंद्र कोठे यांनी रोहित पवार यांच्यावर जोरदार हल्लाबोल केला. रोहित पवार लबाड लांडगा असल्याचे म्हणत शेतकऱ्यांच्या हिताचं सोंग करत असल्याची टीका आमदार कोठे यांनी केली.

आमदार देवेंद्र कोठे म्हणाले, ‘रोहित पवार म्हणजे महाराष्ट्राच्या राजकारणाला लागलेला कलंक आहे. रोहित पवार म्हणजे लबाड लांडगा ढोंग करतोय शेतकऱ्यांच्या हिताचा सोंग करतोय. या व्यक्तीला शेतकऱ्यांचा कधीही हित पाहिलेलं नाहीये. कायम स्वतःच्या राजकारणी महत्वकांक्षी पोटी आंदोलनजीवी भूमिका घेऊन मागच्या सहा महिन्यात वर्षभरात महाराष्ट्राच्या हिताच्या ज्या काही गोष्टी आहेत, त्या ठिकाणी आमदार रोहित पवार आंदोलन करतात’.

‘सोलापुरात एक म्हण आहे, बेगाने शादी मे अब्दुल्ला दिवाना… रोहित पवार तुम्ही बाहेरच्या जिल्ह्यातील आहेत, सोलापूरच्या विकासाच्या प्रकल्पामध्ये तुम्ही हस्तक्षेप करू नका. आमच्या सोलापूर शहराच्या पाण्याची तुम्ही काळजी करू नका.  नऊ टक्के फक्त सोलार असल्यामुळे मासेमारीचे कुठलेही नुकसान होणार नाही. भारतात प्रत्येक ठिकाणी डेटा सेंटर यशस्वी झालेला आहे. ज्या ठिकाणी सोलर पॅनल बसवले आहेत, त्या ठिकाणी कुठल्याही प्रकारची ओरड नाहीये.  केवळ स्वतःची महत्त्वकांक्षा, मीडिया आणि आंदोलनाच्या माध्यमातून मुख्यमंत्री यांच्या जवळ जाऊन बसण्याची संधी मिळण्यासाठी रोहित पवार शेतकऱ्यांना पुढे करून हाच स्टंट करत आहेत. या प्रकल्पाबाबत रोहित पवार आणि त्यांच्या माध्यमातून मोठा नरेटिव्ह पसरवण्यात आला आहे. या प्रकल्पाच्या माध्यमातून 40 ते 42000 लोकांना प्रत्यक्ष अप्रत्यक्षरीत्या रोजगार मिळणार आहे, असा दावा आमदार देवेंद्र कोठे यांनी केला.