Kalyan East Result : कल्याण पूर्वचा निकाल समोर, कोण विजयी, कुणाला किती मतं? वाचा A टू Z

महाराष्ट्र विधानसभा निवडणुकीचा निकाल आज समोर येतोय. राज्यातील अनेक महत्त्वाच्या लढतींपैकी कल्याण पूर्व विधानसभा मतदारसंघाची लढतही चांगलीच चर्चेत ठरली. कल्याण पूर्व विधानसभा मतदारसंघात भाजपकडून आमदार गणपत गायकवाड यांच्या पत्नी सुलभा गायकवाड यांना उमेदवारी देण्यात आली. तर ठाकरे गटाकडून धनंजय बोडारे यांना उमेदवारी देण्यात आली. तसेच शिवसेनेचे शहरप्रमुख महेश गायकवाड यांनी बंडखोरी केली. त्यांनी अपक्ष अर्ज दाखल केला. याशिवाय शिवसेनेचे विशाल पावशे यांनी ऐनवेळी वंचित बहुजन आघाडीत प्रवेश करत उमेदवारी मिळवली. त्यामुळे कल्याण पूर्वेत चौरंगी लढत बघायला मिळाली. असं असलं तरी खरी लढत ही भाजपच्या सुलभा गायकवाड, ठाकरे गटाचे धनंजय बोडारे आणि अपक्ष महेश गायकवाड यांच्यातच जास्त काँटे की टक्कर बघायला मिळाली.

कल्याण पूर्वेचा नेमका निकाल काय?

कल्याण पूर्वेत कोण बाजी मारणार? याकडे संपूर्ण लक्ष लागलेलं होतं. या मतदारसंघात तिरंगी लढत होती. भाजप उमेदवार सुलभा गायकवाड, शिंदे गटाचे बंडखोर अपक्ष उमेदवार महेश गायकवाड आणि ठाकरे गटाचे उमेदवार धनंजय बोडारे यांच्यात ही लढत होती. या अटीतटीच्या लढतीत भाजप उमेदवार सुलभा गायकवाड यांचा दणदणीत विजय झाला आहे. सुलभा गायकवाड यांचा तब्बल 26 हजार 360 मतांनी लीड मिळाली आहे. याचाच अर्थ सुलभा गायकवाड यांचा 26 हजार 360 मतांनी विजय झाला आहे. सुलभा यांना 81,114 मते मिळाली आहेत.

सुलभा गायकवाड यांना टफ फाईट देणारे अपक्ष उमेदवार महेश गायकवाड यांना 54,784 मते मिळाली आहेत. महेश गायकवाड यांनी आपली प्रचंड ताकद लावली होती. त्यांनी भाजप आणि ठाकरे गटाच्या उमेदवारांचा अक्षरश: घाम फोडला होता. पण तरीदेखील या निवडणुकीत महेश गायकवाड यांचा पराभव झाला आहे. दुसरीकडे ठाकरे गटाचे उमेदवार धनंजय बोडारे हे तीन नंबरचे उमेदवार ठरले आहेत. त्यांना 39 हजार 512 मते मिळाली आहेत.

महाराष्ट्राचा निकाल काय?

दरम्यान, महाराष्ट्रात महायुतीत घवघवीत यश मिळताना दिसत आहे. या निवडणुकीत महायुतीला 224 जागांवर यश मिळताना दिसत आहे. तर मविआला केवळ 51 जागांवर समाधान मानावं लागत आहे. या निवडणुकीत महाविकास आघाडीच्या दिग्गाजांचा पराभव होताना दिसतोय. महायुतीने विरोधकांचे अक्षरश: कंबरडे मोडलेले बघायला मिळत आहे. या निवडणुकीत महाविकास आघाडीत ठाकरे गट मोठा पक्ष ठरताना दिसत आहे. ठाकरे गटाला 19, काँग्रेसला 18 आणि शरद पवार गटाला 11 जागांवर यश मिळताना दिसत आहे.