अभ्यासाला लागा, MPSC चे वर्षभराचे वेळापत्रक जाहीर, दोन परीक्षा एकत्र नाही येणार

MPSC Exam Year Calendar 2025: महाराष्ट्र लोकसेवा आयोगामार्फत (MPSC) २०२५ मध्ये होणाऱ्या विविध परीक्षांचे वेळापत्रक जाहीर केले आहे. आयोगाच्या mpsc.gov.in , mpsconline.gov.in या संकेतस्थळावर हे वेळापत्रक प्रसिद्ध करण्यात आले असल्याची माहिती आयोगाकडून देण्यात आली. परीक्षांचे वेळापत्रक तयार करताना विविध दोन परीक्षा एकत्र येणार नाही, त्याची काळजी घेतली गेली असल्याचे आयोगाने स्पष्ट केले आहे. त्यामुळे एमपीएससीची तयारी करणाऱ्या विद्यार्थ्यांना आता वेळापत्रकानुसार अभ्यास करणे सोयीचे होणार आहे.

महाराष्ट्र शासनाच्या विविध पदांच्या भरती महाराष्ट्र लोकसभा आयोगामार्फत करण्यात येते. वर्षभर विविध परीक्षांचे आयोजन करण्यात येते. त्यानुसार २०२५ मध्ये घेण्यात येणाऱ्या परीक्षांचा तारखा निश्चित करण्यात आल्या आहेत. आयोगाकडून हे वेळापत्रक निश्चित करताना संघ लोकसेवा आयोग (यूपीएससी), राज्यातील विविध विद्यापीठे आणि इतर परीक्षा घेणाऱ्या इतर संस्था यांच्याकडून आयोजित करण्यात येणाऱ्या परीक्षांचे वेळापत्रक विचारात घेतले आहे. त्यानंतर महाराष्ट्र लोकसेवा आयोगाच्या परीक्षांचे वेळापत्रक निश्चित करण्यात आले आहे.

आयोगाच्या व विविध संस्थांच्या परीक्षा एकाच दिवशी आल्याने उमेदवारांचे नुकसान टाळण्यासाठी आयोगाच्या वेळापत्रकाची प्रत संबंधित संस्थांना पाठवली आहे. त्या संस्थांनी या तारखा टाळून आपल्या परीक्षा घ्याव्या, अशी सूचनाही आयोगाकडून करण्यात आली आहे.

यंदा लोकसेवा आयोग या परीक्षा घेणार

• दिवाणी न्यायाधीश कनिष्ठ स्तर आणि न्याय दंडाधिकारी प्रथम वर्ग परीक्षांमध्ये दिवाणी न्यायाधीश कनिष्ठ सर्व न्याय दंडाधिकारी प्रथम वर्ग पूर्व परीक्षा व मुख्य परीक्षा
• महाराष्ट्र अराजपत्रित गट- ब आणि गट-क सेवा संयुक्त परीक्षांमध्ये महाराष्ट्र अराजपत्रित गट-ब आणि गट-क सेवा संयुक्त पूर्व परीक्षा
• महाराष्ट्र अराजपत्रित गट- ब सेवा मुख्य परीक्षा
• सहाय्यक मोटार वाहन निरीक्षक मुख्य परीक्षा
• महाराष्ट्र गट- क सेवा मुख्य परीक्षा
• महाराष्ट्र राजपत्रित नागरी सेवा पूर्व परीक्षामध्ये महाराष्ट्र राजपत्रित नागरी सेवा संयुक्त पूर्व परीक्षा
• अन्न व औषध प्रशासकीय सेवा मुख्य परीक्षा
• महाराष्ट्र विद्युत आणि यांत्रिकी परीक्षा
• अभियांत्रिकी सेवा मुख्य परीक्षा
• महाराष्ट्र कृषी सेवा मुख्य परीक्षा
• महाराष्ट्र यांत्रिकी अभियांत्रिकी सेवा मुख्य परीक्षा
• महाराष्ट्र विद्युत अभियांत्रिकी सेवा मुख्य परीक्षा
• महाराष्ट्र स्थापत्य अभियांत्रिकी सेवा मुख्य परीक्षा
• निरीक्षक वैद्यमापक शास्त्र मुख्य परीक्षा
• राज्यसेवा मुख्य परीक्षा
• महाराष्ट्र वनसेवा मुख्य परीक्षा