मालवणमधील छत्रपती शिवाजी महाराजांचा पुतळा बनवणारे शिल्पकार जयदीप आपटे ‘नॉट रिचेबल’

Jaideep Apte: मालवणच्या राजकोट किल्ल्यावरील छत्रपती शिवाजी महाराजांच्या पुतळा दोन दिवसांपूर्वी पडला. यामुळे तमाम शिवप्रेमींमध्ये संतापाची लाट उसळली आहे. विरोधकांनी सरकारला धारेवर धरले आहे. आता या कामात हलगर्जीपणा केल्याप्रकरणी शिल्पकार जयदीप आपटे आणि बांधकाम सल्लागार डॉ. चेतन पाटील यांच्यावर सदोष मनुष्यवधाचा गुन्हा दाखल केला आहे. परंतु गुन्हा दाखल झाल्यानंतर जयदीप आपटे सर्व कुटुंबासोबत घराला टाळे लावून गेले आहे. दोन दिवसांपासून ते नॉट रिचेबल झाले आहेत. मंगळवारी दुपारपर्यंत सुरू असलेल्या त्यांचा मोबाईल क्रमांकही आता बंद आहे. तसेच कल्याण पश्चिमेत त्यांचा कारखाना आहे. तो कारखाना देखील ताडपत्रीच्या साह्याने बंद करण्यात आला आहे.

कोण आहेत जयदीप आपटे

ठाणे येथील 25 वर्षीय युवा शिल्पकार जयदीप आपटे यांना राजकोट येथील शिवाजी महाराजाचा पुतळा निर्मितीची जबाबदारी दिली होती. त्यांना शिल्पकलेचा फक्त अडीच वर्षांचा अनुभव आहे. त्यांनी आतापर्यंत दोन फुटांपर्यंतचे पुतळे उभारले आहेत, असे त्यांनीच एका मुलाखतीत म्हटले होते. 28 फूट उंच शिवाजी महाराजांचा पुतळा उभारण्यासाठी त्यांना तीन वर्ष लागली होती. इतका कमी अनुभव असताना त्यांना हे काम कसे दिले गेले? असे प्रश्न उपस्थित होत आहे.

मराठा महासंघ आक्रमक

शिल्पकार जयदीप आपटे याला कठोर शासन व्हावे व त्याला फाशीची शिक्षा व्हावी, या मागणीसाठी आज अखिल भारतीय मराठा महासंघाच्या वतीने कोल्हापुरात आंदोलन करण्यात आले. प्रांताधिकारी मोशमी बर्डे- चौगुले यांना निवेदन देण्यात आले. यावेळी मोठ्या संख्येने शिवप्रेमी उपस्थित होते. पुण्यात महाविकास आघाडीतर्फे आंदोलन करण्यात आले. कोथरूडमधील शिवाजी महाराजांच्या पुतळ्याजवळ आंदोलन केले गेले. बारामतीमध्ये खासदार सुप्रिया सुळे यांच्या नेतृत्वाखाली आंदोलन केले गेले.

महाविकास आघाडीतर्फे आज मालवणमध्ये निषेध मोर्चा काढण्यात येणार आहे. छत्रपती शिवाजी महाराजांचा पुतळा कोसळल्याचा निषेध नोंदवण्यासाठी हा मोर्चा काढण्यात येणार आहे. भरड नाका ते मालवण तहसीलदार कार्यालयावर मोर्चा निघणार आहे.