मोठी बातमी! मराठा बांधवांसाठी गुडन्यूज; जरांगे पाटलांना मिळालं मोठं यश, एक ते दीड तासांमध्ये आदेश निघणार

मनोज जरांगे पाटील यांनी पुन्हा एकदा मराठा आरक्षणासाठी आंदोलनाची हाक दिली आहे, आंदोलकांसह मनोज जरांगे पाटील आज अंतरवाली सराटीमधून मुंबईच्या दिशेनं रवाना झाले आहेत, मात्र मनोज जरांगे पाटील यांना आझाद मैदानावर आंदोलन करण्यास हाय कोर्टानं मनाई केली आहे. परंतु जरांगे पाटील हे आझाद मैदान येथेच आंदोलन करण्यावर ठाम आहेत. या सर्व पार्श्वभूमीवर आता घडामोडींना वेग आला आहे.

हाय कोर्टानं आझाद मैदानाची परवानगी नाकारल्यानंतर आता जरांगे पाटील यांच्या शिष्टमंडळाने परिमंडळ एकचे पोलीस उपायुक्त प्रवीण मुंडे यांची भेट घेतली आहे. जरांगे पाटील यांच्या शिष्टमंडळानं तब्बल अर्धा तास प्रवीण मुंडे यांच्याशी चर्चा केली. या चर्चेनंतर पुढील दीड तासांमध्ये आझाद मैदानावर आंदोलनासाठी परवानगी देण्यात येणार असल्याचा दावा आता  मनोज जरांगे पाटील यांच्या शिष्टमंडळाच्या वकिलांकडून करण्यात आला आहे.

नवीन अर्ज जो केला आहे,  त्या संदर्भात प्रशासन विचार करत आहे. काही वेळात परवानगी मिळेल, अर्धा ते एक तासात ही परवानगी मिळणार आहे. नवीन नियमावली काल आली आणि त्याप्रमाणे ती न्यायालयात मांडली सुद्धा. त्या पद्धतीने आम्ही अर्ज केलेला आहे . जी कृती कायदेशीर करायची ती आम्ही केलेली आहे.

काल साडेबारा एकच्या दरम्यान आम्ही अर्ज दिलेला आहे,  काल रात्री आम्ही त्या ठिकाणी होतो. सकाळी देखील आम्ही त्या ठिकाणी आलेलो आहे. सगळ्यांना गणेशोत्सवाच्या शुभेच्छा आणि चांगली बातमी अर्ध्या तासात मिळेल याची अपेक्षा करतो, असं शिष्टमंडळाच्या वकिलांनी म्हटलं आहे.

त्या ज्या अटी शर्ती सांगितलेल्या होत्या त्या संदर्भात चर्चा झाली,  कालच्या सुनावणीत जरांगे पाटील कुठेही नव्हते . त्यांचं म्हणणं सादर करण्याची संधी देखील मिळाली नाही. ती संधी न मिळाल्यामुळे या गोष्टी झाल्यात. मैदानाचा वेळ पाळणे व इतर गोष्टी ज्या आहेत, आमरण उपोषणसह आंदोलनासंदर्भातील सर्वबांबीसाठी आम्ही अर्ज केला आहे, असंही ते यावेळी म्हणाले, त्यामुळे आता जरांगे यांचं आंदोलन आझाद मैदानावर होण्याची शक्यता वाढली आहे.