मोठी बातमी! मिसिंग लिंकवरून वाहतूक कधी सुरू होणार? प्रशासनाने दिली सर्वात मोठी अपडेट

मुसळधार पावसामुळे राज्याच्या अनेक भागात जनजीवन विस्कळित झाले आहे. पुण्यावरून मुंबईकडे जाणारी वाहतूक दरड कोसळल्यामुळे प्रभावित झाली आहे. मिसिंग लिंक प्रकल्पातील दुसऱ्या बोगद्याच्या आधी अचानक दरड कोसळल्याने सध्या वाहतूक बंद आहे. सध्या पर्यायी मार्गाने वाहतूक सुरू आहे. अशातच आता मिसिंग लिंकवरून वाहतूक कधी सुरू होणार? याबाबत महत्त्वाची अपडेट समोर आली आहे. याबाबत सविस्तर माहिती जाणून घेऊयात.

मिसिंग लिंकवरून वाहतूक कधी सुरू होणार?

मिसिंग लिंकवरील पुण्याकडून मुंबईकडे जाणाऱ्या मार्गावर दरड कोसळल्याचे समोर आल्यानंतर काही वेळातच घटनास्थळी पोलिस, महामार्ग प्रशासन आणि बचाव पथक दाखल झाले. रस्त्यावर पडलेले दगड आणि माती हटवण्याचे काम तातडीने सुरू करण्यात आले. गेल्या अनेक तासांपासून हे दरड हटवण्याचे काम सुरू आहे. प्रशासकीय अधिकारी घटनास्थळावर हजर असून त्यांच्या देखरेखीखाली काम सुरू आहे. अशातच आता मिसिंग लिंक पुन्हा सुरू होण्यासाठी 5 ते 6 तासांचा वेळ लागणार असल्याची प्राथमिक माहिती समोर आली आहे. मात्र या वेळत आणखी वाढही होण्याची शक्यता आहे.

वाहनचालकांनी काळजी घेण्याचे आवाहन

मुसळधार पावसामुळे मुंबई पुणे मार्गावरील वाहतूक पूर्णपणे विस्कळित झाली आहे. मिसिंग लिंकवर दरड कोसळल्याने वाहनचालकांना पर्यायी मार्गाने प्रवास करावा लागत आहे. तसेच सतत पाऊस सुरू असल्याने वाहनचालकांना त्रासाचा सामना करावा लागत आहे. सध्या प्रशासन संपूर्ण परिस्थितीवर लक्ष ठेऊन आहे. वाहनचालकांना वारंवार योग्य त्या सूचना दिल्या जात आहेत. तसेच वाहन चालकांनीही खबरदारी घेण्याचे आवाहन प्रशासनाकडून करण्यात येत आहे.

वरंधा घाटात दरड कोसळल्याने वाहतूक ठप्प

पुण्याहून कोकणाला जोडणाऱ्या भोर-महाड मार्गावरील वरंधा घाट रस्त्यावर अनेक ठिकाणी दरड कोसळली आहे. त्यामुळे या मार्गावरची वाहतूक पूर्णपणे ठप्प झाली आहे. घाट माथ्यावर सुरू असलेल्या मुसळधार पावसामुळे दरडीसोबत माती, झाडे झुडपांचा राडारोडा रस्त्यावर आल्याने संपूर्ण मार्गावरची वाहतूक बंद करण्यात आली आहे. प्रशासनाकडून आत्तापर्यंत 8 ते 9 ठिकाणची दरडी काढण्यात आली आहे. भोर पोलीस स्टेशनचे पोलीस निरीक्षक निलेश माने पोलीस कर्मचाऱ्यांसह स्वतः उभं राहून दरडी हटविण्याचे काम करवून घेत आहेत. रात्री पासून अनेक ठिकाणी दरडी पडल्या असल्यानं अनेक वाहनं या घाटात अडकून पडली आहेत. पोलीस प्रशासनाकडून अडकलेल्या व्यक्तींची खाण्या-पिण्याची व्यवस्था करण्यात आली आहे.