Zen Sadavarte: गेट आऊट म्हणणाऱ्या महिलेविरोधात झेन सदावर्ते मैदानात!भाजप मोर्चात घातला होता राडा, आता होणार कारवाई?

Zen Sadavarte filed Police Complaint: मुंबईतील जांभोरी मैदान परिसरात नारी वंदन विधेयक नामंजूर झाल्याविरोधात भाजपने जनआक्रोश मोर्चा काढला. त्यामुळे काही काळ वाहतूक खोळंबली. त्याचा संताप एका महिलेने मंत्री गिरीश महाजन यांच्यावर काढला. गेट आऊट म्हणत तिने मोर्चेकरांना सुनावले. पण मंत्री महाजन यांनी हे प्रकरण सामोपचाराने मिटवले. या महिलेच्या संतापावर तीव्र प्रतिक्रिया उमटल्या. आता गुणरत्न सदावर्ते यांची कन्या झेन सदावर्ते हिने या महिलेविरोधात वरळी पोलीस स्टेशनमध्ये लेखी तक्रार दिली आहे. त्यामुळे हा वाद पेटण्याची शक्यता आहे.

गेट आऊट

जांभोरी मैदान परिसरात संध्याकाळी भाजपने मोर्चा आयोजित केला होता. या मोर्चाचे नेतृत्व गिरीश महाजन यांनी केले. या मोर्च्यासाठी रीतसर परवानगी घेण्यात आली होती. पण हमरस्त्यावर त्यामुळे वाहतुकीचा खोळंबा झाला. त्यात एका महिलेचा मुलगा ही अडकला. त्यामुळे ती महिला संतप्त झाली. तिने यावेळी मोर्चेकरांना आणि मंत्री गिरीश महाजन यांना वाहतूक मोकळी करण्याविषयी सुनावले. तिने या मोर्चात राडा घातला. पाण्याची बाटली फेकून मारली होती. तिचा संताप सर्व देशाने पाहिला. पण हे प्रकरण महाजनांनी अत्यंत सौम्यपणे हाताळले. त्यांनी सर्वांनाच शांत केले आणि तिथून ते मोर्चा स्थळाकडे निघाले.

आता झेन सदावर्ते मैदानात

भाजप मोर्चाता राडा करणाऱ्या महिलेविरोधात दोन्ही बाजूंनी मतमतांतरे उमटली. काहींनी तिचा त्रागा योग्य वाटला. मोर्चासाठी जनतेला वेठीस धरणे योग्य नसल्याचे म्हटले तर काहींना तिचा आक्रस्तळेपणा आवडला नाही. दरम्यान आता या राडा घालणाऱ्या महिलेविरोधात झेन सदावर्ते मैदानात उतरली आहे. तिने वरळी पोलीस ठाण्यात या महिलेविरोधात तक्रार दिली आहे.

ही महिला तिच्या मर्सिडीजमधून उतरून मोर्चात व्यत्यय आणत होती. ती मोर्चेकरांना असभ्य भाषेत बोलत होती. शट अप, डोन्ट टॉक टू मी, गेट आऊट हे अपमानजनक शब्दांचा वापर करत होती. आपण वरळी पोलीस ठाण्यात याविषयी तक्रार दाखल केली आहे. सदर महिलेविरोधात पोलिसांनी कारवाई करावी अशी विनंती आपण केल्याचे झेन सदावर्ते हिने स्पष्ट केले.