Mumbai : गृहमंत्री अमित शाह मुंबईत दाखल, उद्या ठरणार का BMC निवडणूकीची रणनीती..! सोमवारी भरगच्च कार्यक्रम
मुंबई महापालिकेची निवडणूक ही काही दिवसांवर येऊन ठेपली आहे. शिवाय मध्यंतरीच्या राजकीय घडामोडीनंतर शिवसेना ही एकाकी पडली असून त्याअनुशंगाने भाजपाच्या बैठकीत ते पदाधिकाऱ्यांना काय सूचना देणार हे देखील महत्वाचे ठरणार आहे. निवडणूकांपूर्वी अमित शाह यांच्या दौऱ्याला महत्व असते. यंदा तर मुंबई महापालिका हे भाजपाचे प्रमुख मिशन असणार आहे.
मुंबई : देशाचे (Amit Shah) गृहमंत्री अमित शाह हे दरवर्षी लालबागच्या राजाच्या दर्शनासाठी दाखल होत असतात. यंदाच्या दौऱ्याला विशेष महत्व प्राप्त झाले आहे. सत्तांतरानंतर त्यांचा हा पहिलाच दौरा आहे. तर (Mumbai Municipal Election) मुंबई महापालिका निवडणूकीच्या अनुशंगाने या दौऱ्याला विशेष महत्व प्राप्त झाले आहे. रविवारी रत्री 10 वाजता ते मुंबई विमानतळावर दाखल झाले होते. त्यांच्या स्वागतासाठी (CM Eknath Shinde) मुख्यमंत्री एकनाथ शिंदे, उपमुख्यमंत्री देवेंद्र फडणवीस, भाजपाचे प्रदेशाध्यक्ष चंद्रशेखर बावनकुळे, आशिष शेलार आदी उपस्थित होते. सह्याद्री या शासकीय अतिथीगृहावर त्यांचा मुक्काम असणार आहे. सोमवारी दिवसभर त्यांचे विविध कार्यक्रम राहणार तर भाजपाच्या कोअर कमिटीच्या बैठकीत ते काय कानमंत्र देणार हे देखील तेवढेच महत्वाचे राहणार आहे.
सोमवारी दिवसभर असे राहणार कार्यक्रम
अमित शाह हे मुंबईत दाखल झाले असून सह्याद्री या शासकीय अतिथीगृहावर पोलिस बंदोबस्त हा वाढवण्यात आला आहे. सोमवारी सकाळी 10 ते लालबागच्या राजाचे दर्शन घेणार आहेत. त्यानंतर ते वांद्रे येथील सार्वजनिक गणेश उत्सवाच्या ठिकाणी हजेरी लावणार आहेत. गणरायाचे दर्शन झाल्यानंतर 11 च्या सुमारास भाजपच्या कोअर कमिटीच्या बैठकीत ते मार्गदर्शन करणार आहेत.
मुंबई महापालिकेच्या अनुशंगाने दौऱ्याला महत्व
मुंबई महापालिकेची निवडणूक ही काही दिवसांवर येऊन ठेपली आहे. शिवाय मध्यंतरीच्या राजकीय घडामोडीनंतर शिवसेना ही एकाकी पडली असून त्याअनुशंगाने भाजपाच्या बैठकीत ते पदाधिकाऱ्यांना काय सूचना देणार हे देखील महत्वाचे ठरणार आहे. निवडणूकांपूर्वी अमित शाह यांच्या दौऱ्याला महत्व असते. यंदा तर मुंबई महापालिका हे भाजपाचे प्रमुख मिशन असणार आहे. दरम्यान, नवनियुक्त पदाधिकारी आणि त्यानंतर आता होत असलेली मुंबई महापालिका निवडणूक त्यामुळे या बैठकीत ते पदाधिकाऱ्यांना काय कानमंत्र देतात यावरही बरेच काही अवलंबून आहे.
मुख्यमंत्र्यांच्या शासकीय निवासस्थानीही हजेरी
भाजपाची कोअर कमिटीची बैठक झाल्यानंतर अमित शाह हे मुख्यमंत्री एकनाथ शिंदे यांच्या वर्षा निवासस्थानी जाऊन बाप्पांचे दर्शन घेणार आहेत. आतापर्यंत मुख्यमंत्री आणि उपमुख्यमंत्री यांनी अनेक वेळा दिल्लीवारी केली आहे. पण आता अमित शाह हेच मुंबईत दाखल झाले असून त्यांचे मार्गदर्शन राज्य सरकारची रणनीती आणि भाजपाची आगामी काळातील वाटचाल या दृष्टीने हा दौरा महत्वाचा मानला जात आहे.
दौरा गणरायाच्या दर्शनासाठा चर्चा मात्र राजकीयच
अमित शाह हे दरवर्षी गणेश उत्सवामध्ये लालबागच्या राजाच्या दर्शनसाठी मुंबईत दाखल होत असतात. यंदाही ते यानिमित्ताने मुंबईत आले असले तरी त्यांच्या दौऱ्याला राजकीय किनारही आहेच. शिंदे-फडणवीस सरकार स्थापनेनंतर ते राज्याच्या राजधानीत दाखल झाले आहेत. त्यामुळे महापालिका निवडणूकांमध्ये शिंदे गट आणि भाजप एकत्र सामोरे जाणार का? मनसेच्या युतीबाबत काय होणार? असे एक ना विषयांनी हा दौरा चर्चेत आहे.
