Tv9 EXCLUSIVE | महाविकास आघाडीत कोण कोणत्या मतदारसंघातून लढेल? वाचा संपूर्ण यादी

महाविकास आघाडीच्या गोटातली इनसाईड बातमी 'टीव्ही 9 मराठी'च्या हाती लागली आहे. महाविकास आघाडीचं जवळपास 40 जागांवर एकमत झालंय. पण अद्यापही 8 जागांचा तिढा कायम आहे. या जागांवर आता तीनही पक्षांचे प्रमुख चर्चा करणार असल्याची माहिती समोर येत आहे.

Chetan Patil | Updated on: Feb 28, 2024 | 10:00 PM

निवृत्ती बाबर, Tv9 प्रतिनिधी, मुंबई | 28 फेब्रुवारी 2024 : महाविकास आघाडीची आज जागावाटपाबात शेवटची आणि महत्त्वाची बैठक पार पडली. या बैठकीत काही जागांवर तीनही पक्षांचं एकमत झालं आहे. अनेक जागांचा तिढा सुटला आहे. तरीही लोकसभेच्या जवळपास 8 जागांवरील तिढा अद्यापही सुटलेला नाही, अशी माहिती सूत्रांकडून मिळत आहे. विशेष म्हणजे कोणत्या मतदारसंघात कुणाला जागा सुटली आहे याबाबतची एक्सक्लुझिव्ह माहिती ‘टीव्ही 9 मराठी’च्या हाती लागली आहे. सूत्रांकडून जागावाटपाबाबत महाविकास आघाडीतली आतली बातमी देण्यात आली आहे. या बातमीनुसार, आतापर्यंत झालेल्या चर्चेनुसार शिवसेना ठाकरे गटासाठी आतापर्यंत 15 जागांचा निर्णय झाला आहे. तसेच हातकणंगलेची जागा ठाकरे गट स्वाभिमानी शेतकरी संघटनेसाठी सोडायला तयार आहे. तर अकोल्याची जागा वंचित बहुजन आघाडीसाठी सोडणार आहे. राष्ट्रवादीसाठी 8 जागांचा निर्णय झालाय. काँग्रेससाठी 14 जागांचा निर्णय झाला. तर 8 जागांसाठी अजूनही तिढा कायम आहे. आता याबाबत थेट तीनही पक्षांचे प्रमुख निर्णय घेणार असल्याची माहिती समोर येत आहे.