अनिल देशमुखांची ईडी कोठडी संपणार, जामीन मिळणार का?

मुंबई: माजी गृहमंत्री अनिल देशमुख यांना सत्र न्यायालयाने दिलेल्या न्यायलयीन कोठडीला ईडीने उच्च न्यायालयात आव्हान दिल्यानं पुन्हा ईडी कोठडीत जावं लागलं होतं. मुंबई हायकोर्टानं अनिल देशमुख यांनी 12 नोव्हेंबरपर्यंत सुनावलेली ईडी कोठडी 15 नोव्हेंबरपर्यंत वाढवण्यात आली होती त्याची मुदत संपणार आहे. अनिल देशमुख यांना जामीन मिळणार का हे पाहावं लागणार आहे.

अनिल देशमुख यांना 15 नोव्हेंबरपर्यंत ईडी कोठडी

अनिल देशमुख यांना 12 नोव्हेंबरला पुन्हा कोर्टात हजर करण्यात आले होते. यावेळी त्यांना जामीन मिळावा म्हणून त्यांचे वकील इंदरपाल सिंग यांनी कोर्टासमोर युक्तिवाद केला. देशमुख ईडीला सहकार्य करत असल्याने त्यांना जामीन मिळायला हवा, असा युक्तिवाद सिंग यांनी केल्याचं सूत्रांनी सांगितलं होतं. तर ईडीच्या वकिलांनी देशमुख यांच्या जामिनाला विरोध करत त्यांना कोठडी देण्याची मागणी केली होती. कोर्टाने दोन्ही बाजू ऐकून घेतल्यानंतर देशमुख यांना 15 नोव्हेंबरपर्यंतची ईडी कोठडी सुनावली. त्या कोठडीची मुदत आज संपणार आहे.

नेमकं काय आहे प्रकरण?

मुंबईचे माजी पोलीस आयुक्त परमबीर सिंग यांनी मुख्यमंत्री उद्धव ठाकरे आणि राष्ट्रवादी काँग्रेसचे अध्यक्ष शरद पवार यांना पत्र लिहून माजी गृहमंत्री अनिल देशमुख यांच्यावर गंभीर आरोप केले होते. अनिल देशमुखांनी सचिन वाझेला प्रत्येक महिन्याला 100 कोटी रुपयांचं वसुलीचं टार्गेट दिलं होतं, असा खळबळजनक आरोप परमबीर सिंग यांनी पत्राच्या माध्यमातून केला होता. यानंतर निलंबित एपीआय सचिन वाझे यांच्यावरही या प्रकरणातील प्रमुख आरोपी म्हणून अटकेची कारवाई करण्यात आली. तसंच देशमुख यांचे खासगी सचिव संजीव पालांडे आणि खासगी सहायक कुंदन शिंदे यांनाही याचप्रकरणात गेल्या दोन महिन्यांपूर्वी अटक करण्यात आली होती. सचिन वाझे सध्या महाराष्ट्र पोलिसांच्या कोठडीत आहे.

ईडीनंतर सीबीआयच्या कारवाईची टांगती तलवार

अनिल देशमुख सध्या ईडी कोठडीत असून ईडीनंतर सीबीआय देखील अनिल देशमुखांवर कारवाई करण्याची शक्यता असल्याची माहिती आहे.

इतर बातम्या:

Special Report | हिंसाचारावरूनही आता राजकारण होणार का?

Babasaheb Purandare | शिवशाहीर बाबासाहेब पुरंदरे यांची प्रकृती चिंताजनक; थेट LIVE UPDATE