उपवर्गीकरणासाठी मातंग समाजाचा रेटा, मुंबईत आंदोलनापूर्वीच पोलिसांकडून धरपकड, वातावरण तापले

उपवर्गीकरणासाठी मातंग समाजाचे आझाद मैदानात आंदोलन

Matang Community Agitation on Mumbai Azad Maidan: अनुसूचित जाती (एससी) प्रवर्गातील उपवर्गीकरणावरून राज्यात वातावरण तापलेले असतानाच मुंबईत आज मोठी घडामोड घडली. उपवर्गीकरण लागू करावे यासाठी मातंग समाजाने आंदोलन केले. या आंदोलनावेळी मंत्रालय ते छत्रपती शिवाजी महाराज टर्मिनल हा रस्ता बंद करण्याचा प्रयत्न आंदोलकांनी केला. त्यामुळे या परिसरातील वाहतूक कोंडी निर्माण झाली. पोलिसांनी तातडीने आंदोलकांची धरपकड सुरू केली. काही आंदोलनकांना ताब्यात घेतले. यावेळी आंदोलक आणि पोलिसांमध्ये झडपट झाल्याचे दिसून आले. आझाद मैदानाच्या बाहेर आंदोलक आक्रमक झाले. आता पोलीस बॅरिकेटिंग लावत आहेत. पण काही काळ या परिसरात मोठा गोंधळ निर्माण झाला आहे. हा परिसर घोषणांनी दणाणून गेला आहे. पोलिसांचा मोठा बंदोबस्त या ठिकाणी लावण्यात आलेला आहे.

उपवर्गीकरणीच अंमलबजावणी त्वरीत करा

आज आरक्षणाच्या उपवर्गीकरणाच्या समर्थनार्थ आज लाखोंच्या संख्येने समाज बांधव आझाद मैदानात येणार आहे. अनुसूचित जाती मधील आरक्षणचा फायदा या काही मोजक्या समाजाने घेतला होत यासंदर्भात सुप्रीम कोर्टाने निरीक्षण नोंदवून हे अनुसूचित जाती मधील आरक्षणच उपवर्गीकरण झाला पाहिजे असा निर्णय दिला आहे पण याची अंमलबजावणी ही राज्य सरकार कडून करण्यात येत नसल्यामुळे आम्हाला हे आज आंदोलन करावं लागत असल्याची प्रतिक्रिया विधानपरिषदेचे भाजप आमदार अमित गोरखे यांनी दिली.

आमच्या हक्काचं आरक्षण द्या

आम्हाला कोणाच्या ताटातील आरक्षण नको आहे आम्हाला आमच्या हक्काच आरक्षण हवं आहे आणि आमची लोकसंख्या किती तेवढं आरक्षण आम्हाला हव आहे ही आमची साधी मागणी आहे आणि या मागणीला इतर समाज देखील पाठिंबा देतील. कोण या आंदोलनाला विरोध करत आहे हे मला माहीत नाही पण आज अनुसूचित जातीमधील सर्व समाज घटकातील बांधव हे सजग झाले आहेत आणि ते आपल्या हक्कांसाठी लढत आहेत, असे गोरखे म्हणाले.

वेळप्रसंगी आम्हाला आमच्या राज्य सरकार च्या विरोधात देखील भूमिका घ्यावी लागेल पण आमची आरक्षण कृती समिती आहे या आंदोलांनंतर कोणती भूमिका घ्यायची आहे यासंदर्भातील सर्व निर्णय ती समिती घेणार असे त्यांनी स्पष्ट केले.

रमेश कदम नजरकैदेत

मुंबईत मातंग समाजाच्या मोर्चात सहभागी होण्यापूर्वीच NCP चे माजी आमदार रमेश कदम यांना पोलिसांनी हाऊस अरेस्ट, नजरकैद केले आहे. रमेश कदम यांनी व्हिडिओच्या माध्यमातून कार्यकर्त्यांना आवाहन केले की आपल्याला आरक्षणाचा जीआर घ्यायचा आहे. मी अकरा वाजता मेट्रो सिनेमा जवळ येत आहे. तुम्ही पण या आपल्याला आरक्षणाचा जीआर घ्यायचा आहे. मी आता मातंग समाजाच्या आरक्षणाचा जीआर घेण्यासाठी आझाद मैदानाकडे येत आहे. मातंग समाजाच्या तरुणांनो, तुम्हीही मोठ्या संख्येने या, असे आवाहन केले होते. पोलिसांनी खबरदारी म्हणून रमेश कदम यांना नजर कैद केले आहे.