मुंबईत डान्सबारमध्ये तरुणींवर पैशांची उधळपट्टी, मनसे नेत्याकडून धक्कादायक VIDEO शेअर

मुंबई : मुंबईत बारमध्ये मुली नाचवणं आणि त्यावर पैशांची उधळपट्टी करणं यास कायद्याने बंदी आहे. असं असताना महाराष्ट्राची राजधानी अशी ख्याती असलेल्या मुंबई शहरात सर्रासपणे डान्सबार सुरु असल्याचा आरोप करण्यात आलाय. विशेष म्हणजे डान्सबारचा व्हिडीओ देखील सोशल मीडियावर शेअर करण्यात आला आणि संबंधित डान्सबार तोडावा का? असा सवाल मुख्यमंत्री एकनाथ शिंदे यांना करण्यात आलाय.

महाराष्ट्र नवनिर्माण सेनेचे नेते नयन कदम यांनी आपल्या अधिकृत ट्विटर अकाउंटवर संबंधित व्हिडीओ शेअर करत मुख्यमंत्र्यांना इशारा दिला होता. कदम यांनी शेअर केलेल्या व्हिडीओत काही तरुणी डान्सबारमध्ये नाचताना दिसताहेत आणि तिच्यावर काही तरुण पैशांची उधळपट्टी करताना दिसत आहेत.

नयन कदम यांनी व्हिडीओसोबत मुख्यमंत्र्यांना डान्सबार तोडू का? असा प्रश्न विचारलाय. “बोरिवलीत कस्तुरबामार्ग हद्दीत क्लब 9, चारवॉक, पार्कसाईड बार येथे सकाळी 4 ते 5 वाजेपर्यंत पैशांची उधळण, अश्लील नृत्य सुरू. मुख्यमंत्री एकनाथ शिंदे साहेबांनी ठाण्यात 13 बार तोडले, आता बोरीवलीत आम्ही बार तोडावे का?”, असा सवाल करत नयन कदम यांनी टोला लगावलाय.

नयन कदम यांनी शेअर केलेला व्हिडीओ चांगलाच तुफान व्हायरल झाला. तसेच या व्हिडीओची दखल प्रसारमाध्यमांनी घेतली. पण त्यानंतर थोड्या वेळात संबंधित व्हिडीओ नयन कदम यांच्या अकाउंटवरुन हटवण्यात आला.

दरम्यान, संबंधित व्हिडीओ प्रकरणी पोलीस खरंच पडताळणी करतात का, व्हिडीओ खरा असेल तर संबंधित बारवर कारवाई करतात का? हे पाहणं महत्त्वाचं ठरेल.