सावधान… ते येतात, वरिष्ठ पोलीस अधिकारी असल्याचं सांगतात अन्… मुंबईत बड्या हॉटेलमसोर काय घडलं?

मुंबईतून एक धक्कादायक बातमी समोर आली आहे. स्वतःला वरिष्ठ पोलीस अधिकारी असल्याचे भासवून नागरिकांची फसवणूक करणाऱ्या आणि बँकेकडून कर्ज मंजूर करून देण्याचे आमिष दाखवत पैसे उकळणाऱ्या तिघांच्या टोळीचा मुंबई गुन्हे शाखेने पर्दाफाश केला आहे. गुन्हे शाखेच्या कक्ष-9 पथकाने अंधेरी येथील ‘द लीला’ हॉटेल परिसरात सापळा रचून तिघांना अटक केली आहे. या आरोपींकडून बनावट शासकीय ओळखपत्रे, इतर बनावट कागदपत्रे आणि पोलिसांची पाटी लावलेली चारचाकी गाडी जप्त करण्यात आली आहे. याबाबत सविस्तर माहिती जाणून घेऊयात.

बनावट ओळखपत्राच्या आधारे…

गुन्हे शाखेला मिळालेल्या तक्रारीनुसार, सुमारे 54 वर्षीय मुख्य आरोपी स्वतःला वरिष्ठ पोलीस अधिकारी असल्याचे भासवत होता. त्यासाठी तो बनावट शासकीय ओळखपत्राचा वापर करत होता. तसेच पोलिसांची पाटी लावलेल्या टाटा पंच कारमधून फिरत नागरिकांमध्ये विश्वास निर्माण करत होता. त्यानंतर आपल्या साथीदारांसह बँकेकडून कर्ज मंजूर करून देण्याचे आश्वासन देत नागरिकांकडून मोठ्या प्रमाणात पैसे उकळत असल्याची माहिती गुन्हे शाखेला मिळाली होती.

गुन्हे शाखेना सापळा रचून…

या माहितीच्या आधारे गुन्हे शाखेच्या कक्ष-9 ने मानवी आणि तांत्रिक माहितीचे विश्लेषण करून आरोपी अंधेरीतील ‘द लीला’ हॉटेल परिसरात येणार असल्याची खात्री केली. त्यानुसार 26 जूनला सापळा रचण्यात आला. या कारवाईत फक्त दहावी शिकलेला सांगलीत राहणारा मुख्य आरोपी मोहम्मद गौश इब्राहिम खतीब, कल्याण येथे राहणारा शाहिद कपाडिया, सांगलीत राहणारा मजहब खतीब अशा तिघांना ताब्यात घेण्यात आले.

गुन्हा दाखल

तपासादरम्यान आरोपींकडून वरिष्ठ पोलीस अधिकारी असल्याचे भासविणारी बनावट शासकीय ओळखपत्रे, इतर बनावट कागदपत्रे आणि पोलिसांची पाटी लावलेली टाटा पंच कार जप्त करण्यात आली. या प्रकरणी गुन्हे शाखेने विविध कलमांनुसार गुन्हा दाखल केला असून, सहार पोलीस ठाण्यातही संबंधित गुन्ह्याची नोंद करण्यात आली आहे. तपासादरम्यान आणखी एक धक्कादायक बाब समोर आली आहे.

सखोल तपासाला सुरुवात

अटक करण्यात आलेल्या तिसऱ्या आरोपीविरुद्ध यापूर्वी कस्तुरबा मार्ग, साकीनाका आणि खेतवाडी पोलीस ठाण्यांमध्ये फसवणूक आणि इतर गंभीर स्वरूपाचे गुन्हे दाखल असल्याचे उघड झाले आहे. त्यामुळे ही टोळी यापूर्वीही अशाच प्रकारच्या गुन्ह्यांमध्ये सक्रिय होती का, याचा तपास गुन्हे शाखेकडून सुरू आहे. ही कारवाई मुंबई पोलीस आयुक्तालयाच्या वरिष्ठ अधिकाऱ्यांच्या मार्गदर्शनाखाली गुन्हे शाखेच्या कक्ष- 9 चे प्रभारी पोलीस निरीक्षक गणेश पिसाळ आणि त्यांच्या पथकाने यशस्वीपणे पार पाडली. या प्रकरणाचा पुढील तपास सुरू असून, या टोळीने आणखी किती नागरिकांची फसवणूक केली आहे, याचाही शोध पोलीस घेत आहेत.