मुंबईसाठी डबलडेकर टनेल तयार करा, मुख्यमंत्र्यांचे आदेश

मुंबई : मुंबईत वाहनांची सतत कोंडी होत असते. त्यामुळे मुंबईकरांचा अर्धे आयुष्य प्रवासात जाते. त्यामुळे या वाहतूक कोंडीतून सामान्य मुंबईकरांची सुटका व्हावी यासाठी डबलडेकर टनेलच्या पर्यायावर अभ्यास केला जात आहे. मुंबईसाठी एकात्मिक वाहतूक व्यवस्थापनाचा गुरूवारी मुख्यमंत्री एकनाथ शिंदे आणि उपमुख्यमंत्री देवेंद्र फडणवीस यांनी आढावा घेतला.

मुंबईतील वाढत्या वाहतूक कोंडीवर उपाय शोधण्यासाठी एका बैठकीचे आयोजन करण्यात आले होते. यात अनेक वाहतूक पर्यायांवर चर्चा झाली. त्यात मुंबईतील वाहतूक व्यवस्था सुधारण्याासाठी डबलडेकर टनेल तयार करता येईल काय यावर सुद्घा चर्चा झाली आहे. त्यामुळे अवजड वाहतूकीसाठी हा डबलडेकर कंटेनरसाठी हा पर्याय वापरून वाहनांची संख्या कमी करता येईल काय या पर्यायाची पडताळणी केली जात आहे. म्हणून मुंबईसाठी डबलडेकर टनेलचा पर्याय अवलंबण्यासाठी वरिष्ठ सनदी अधिकारी आणि एकात्मिक वाहतूक प्रणाली यंत्रणा तयार करणाऱ्या तंत्रज्ञांनी लवकर बैठक घ्यावी त्याबाबत अहवाल सादर करावा असे निर्देश मुख्यमंत्री एकनाथ शिंदे यांनी दिले आहेत.

मल्टी मॉडेल इंटिग्रेटेड ट्रान्सपोर्टेशन नेटवर्क टनेलच्या माध्यमातून साकारण्याबाबत यावेळी चर्चा करण्यात आली. वर्षा निवासस्थानी यासंदर्भात झालेल्या या बैठकीत मुंबईतील वाढती वाहतुक आणि त्यावरील उपाय, सार्वजनिक वाहतुकीला प्राधान्य यासंदर्भात सविस्तर चर्चा करण्यात आली. यावेळी सादरीकरणही करण्यात आले.

एमएमआरडीए क्षेत्र एकात्मिक वाहतुक प्रणालीद्वारे जोडून वाहतूक कोंडी कमी करण्याबाबत यावेळी चर्चा करण्यात आली. मुंबईसाठी मल्टीडेक टनेल काळाची गरज असून त्याचा अभ्यास करण्यासाठी मुंबई महापालिका आयुक्त आय. एस. चहल, एमएमआरडीएचे आयुक्त श्रीनिवासन, मुंबई महापालिकेच्या अतिरीक्त आयुक्त अश्विनी भिडे यांनी तांत्रिक टीम सोबत बैठक घेऊन या एकात्मिक वाहतूक प्रणालीबाबत अहवाल सादर करण्याचे निर्देश यावेळी मुख्यमंत्र्यांनी दिले. यावेळी आमदार राजेंद्र पटणी, महापालिका आयुक्त आय. एस. चहल, एमएमआरडीएचे आयुक्त श्रीनिवासन, मुंबई महापालिकेच्या अतिरीक्त आयुक्त अश्विनी भिडे, पी. वेलारासू आदी यावेळी उपस्थित होते.