SC On MLA Sanjay Raimulkar : आता फैसल्याची घडी समीप, आमदार संजय रायमुलकर यांची कामी येईल का बंडखोरी
MLA Sanjay Raimulkar : राज्यातील 16 आमदारांच्या अपात्रतेचा निकाल आता अवघ्या काही तासांवर येऊन ठेपला आहे. यामध्ये बुलडाणा जिल्ह्यातील मेहकर विधानसभा मतदारसंघाचे आमदार संजय रायमुलकर यांचा ही समावेश आहे.
नवी दिल्ली : राज्यातील सत्ता संघर्षाचे नाट्य आता अंतिम चरणात पोहचले आहे. अवघ्या काही तासांवर या नाट्याचा नाट्यमय अंत होणार हे निश्चित आहे. 16 आमदारांच्या अपात्रतेचा निकाल काय येतो, याकडे संपूर्ण राज्याचेच नाही तर देशाचे लक्ष लागले आहे. पक्षांतर बंदी सारख्या मुद्यावर सर्वोच्च न्यायालय काय भूमिका घेते हे हा निकाल अधोरेखित करेल. बंडखोरी केलेल्या आमदारांमध्ये बुलडाणा जिल्ह्यातील मेहकर विधानसभा मतदारसंघाचे नेतृत्व करणारे आमदार संजय रायमुलकर (MLA Sanjay Raimulkar) यांचा ही समावेश आहे. पेशाने डॉक्टर असलेल्या रायमुलकर यांचे देव सध्या पाण्यात आहेत. सर्वोच्च न्यायालय आता बंडखोरीवर काय उपचार करते, हे काही तासातच समोर येईल.
या 16 आमदारांच्या पात्रतेवर होणार निर्णय राज्यातील सत्ता संघर्षाचा निकाल गुरुवारी सकाळी 11 वाजता जाहीर होणार आहे. या निकालात 16 आमदार अपात्र होणार की नाही, याचाही निकाल सर्वोच्च न्यायालय देणार आहे. या सोहळा आमदारांमध्ये मुख्यमंत्री एकनाथ शिंदे, मंत्री अब्दुल सत्तार, संदीपान भुमरे, संजय शिरसाट, तानाजी सावंत, यामिनी जाधव, चिमणराव पाटील, भरत गोगावले, लता सोनावणे, प्रकाश सुर्वे, बालाजी किणीकर, अनिल बाबर, महेश शिंदे, संजय रायमुलकर, रमेश बोरणारे आणि बालाजी कल्याणकर यांचा समावेश आहे.
जाधव यांच्या नंतर रायमुलकर मेहकर विधानसभा मतदारसंघ अनेक वर्षांपासून शिवसेनेचा बालेकिल्ला मानला जातो. गेल्या कित्येक वर्षांपासून या मतदारसंघावर शिवसेनेचा भगवा फडकत आहे. सध्याचे जिल्ह्याचे खासदार प्रतापराव जाधव हे या मतदारसंघाचे प्रतिनिधीत्व करत होते. त्यांनी एकखांबी या मतदारसंघात शिवसेनेची सत्ता टिकवली होती. त्यानंतर हा मतदारसंघ राखीव झाला. जाधव यांचा आमदार की सुटून खासदारकीचा प्रवास सुरु झाला. त्यानंतर डॉक्टर रायमुलकर यांच्या खांद्यावर या मतदारसंघाची धूरा आली आहे.
घाटावर शिवसेनेचा वरचष्मा बुलडाणा जिल्ह्यात घाटावर आणि घाटाखाली अशी विभागणी आहे. घाटावर बुलडाणा, मेहकर विधानसभा मतदारसंघात सध्या शिवसेनेचे आमदार आहेत. संजय गायकवाड आणि संजय रायमुलकर या दोघांनी शिंदे गटात नशीब आजमावले आहेत. चिखली मतदारसंघात भाजपची पकड कायम आहे. घाटाखाली भाजपचा वरचष्मा आहे. याभागात राष्ट्रीय स्वयंसेवक संघाचा मोठा प्रभाव आहे. बुलडाणा जिल्ह्यातील अनेक बँका, शैक्षणिक संस्थांवर त्यांची मजबूत पकड आहे. सध्या जिल्ह्यात शिवसेनेत पडलेल्या दोन खेम्यामुळे भाजपला कितपत फायदा होतो ते समोर येईल.
निर्णयानंतर समीकरणे बदलतील सर्वोच्च न्यायालयाच्या निकालानंतर समीकरणे बदलतील. हा निकाल काही येवो. जिल्ह्यात राजकीय समीकरणे बदलतील. मोठा उलटफेर दिसून येईल. कार्यकर्ते त्यांचे नेते बदलवू शकतात. तसेच पक्षांतर ही घडेल. हा निर्णय बुलडाणा जिल्ह्यासाठी महत्वाचा आहे. कारण दोन आमदार आणि एक खासदार शिंदे गटासोबत आहेत. निकालाचे परिणाम जिल्ह्यात मोठा उलटफेर करतील, हे निश्चित.
