संजय राऊत यांनी पोलिसांना का घेतले फैलावर, काय दिला सूचक इशारा

मुंबई | 12 नोव्हेंबर 2023 : मुंब्रामधील शाखा पाडल्याचा वाद काल चांगलाच पेटला. माजी मुख्यमंत्री उद्धव ठाकरे यांनी यापूर्वीच या परिसराला भेट देण्याचे जाहीर केले होते. शनिवारी पोलिसांनी त्यांना या परिसात येण्यास मनाई केली होती. नंतर या भूमिकेपासून पोलिसांनी फारकत घेतली. संध्याकाळी ठाकरे या परिसरात पोहचले. त्यांनी मुख्यमंत्री एकनाथ शिंदे यांच्या बालेकिल्ल्यात जोरदार शक्तीप्रदर्शन केले. पण पोलिसांनी त्यांना शाखास्थळापासून हाकेच्या अंतरावर अडवले. याविषयी संजय राऊत यांनी आज सकाळी पत्रकार परिषद घेतली. त्यांनी पोलिसांच्या भूमिकेवर प्रश्नचिन्ह उपस्थित केले आणि एक सूचक इशारा दिला.

काय म्हणाले राऊत

दिवाळीत राज्यातील वातावरण खराब होऊ नये. आम्हाला राज्याचं वातावरण बिघडवायचं नसल्याचे त्यांनी स्पष्ट केले. पण पोलिसांच्या भूमिकेवर त्यांना नाराजी व्यक्त केली. पोलिसांच्या भूमिकेवर त्यांनी चांगलेच तोंडसूख घेतले. काल पोलिसांनी उद्धव ठाकरे यांना मुंब्रा येथील शाखा स्थळी येण्यास मनाई केली. कलम 144 अन्वये नोटीस बजावली होती. नंतर ती मागे घेण्यात आली. तसचे शाखा स्थळी जाण्यास प्रतिबंध केला होता.

दरोडा घालणाऱ्यांनाच संरक्षण

आमच्या शाखांवर दरोडा घालणाऱ्यांनाचीच सुरक्षा पोलीस करत असल्याचा आरोप खासदार राऊत यांनी केला. आमची शाखा पाडली. त्यावर अतिक्रमण केले. पोलीस काल चोरांची सुरक्षा करत होते, असा गंभीर आरोप त्यांनी केला. काल पोलिसांची हतबलता आम्ही पाहिल्याचा टोला ही त्यांनी लगावला.

आणि दिला इशारा

काल पोलिसांनी चोरांची सुरक्षा केली. दरोडा घालणाऱ्यांच्या पाठिशी पोलीस होते, असा आरोप संजय राऊत यांनी केला. पोलिसांच्या कालच्या एकूणच भूमिकेवर त्यांनी जाहीर नाराजी व्यक्त केली. त्यांनी यावेळी एक सूचक इशारा पण दिला. 2024 मध्ये आम्ही सत्तेत असू आणि तुम्ही पण तुमच्या जागी असाल, असा सूचक इशारा त्यांनी यावेळी दिला.

आता कायदेशीर लढाई

आता या वादावर उद्धव ठाकरे गट कायदेशीर सामना करण्याच्या तयारीत आहे. शाखेचा वाद लवकरच हायकोर्टात पोहचणार आहे. ठाकरे गट याप्रकरणात मुंबई उच्च न्यायालयात याचिका दाखल करणार आहे. त्यामुळे मुंब्रा शाखेची लढाई आता अनेक दिवस चालणार हे निश्चित आहे.