नागपुरात रेल्वे भरतीत फर्जीवाडा, नाव एकाचं पण परीक्षा देण्यासाठी दुसराच पोहोचला, असं फुटलं बिंग…

रेल्वे ग्रुप डी भरतीच्या शारीरिक पात्रता परीक्षेदरम्यान नागपुरात मुन्नाभाई प्रकारचा फर्जीवाडा उघडकीस आला आहे. दुसऱ्या उमेदवाराच्या नावावर परीक्षा देण्यासाठी आलेल्या डमी उमेदवाराने संशय येताच पळून जाण्याचा प्रयत्न केला. मात्र, अजनी पोलिसांनी त्याला पकडून ताब्यात घेतले. रेल्वे स्टेडियम मैदानावर शारीरिक पात्रता परीक्षा सुरू असताना हा प्रकार समोर आला.

रेल्वे भरतीत फर्जीवाडा

रेल्वेचे वरिष्ठ अधिकारी राजेंद्रकुमार परदेशी यांना एका तरुणाच्या हालचाली संशयास्पद वाटल्या. त्यानंतर उमेदवारांच्या कागदपत्रांची तपासणी सुरू असताना हा फर्जीवाडा उघडकीस आला. अंकित तिवारी या उमेदवाराचे नाव पुकारण्यात आले असता त्याऐवजी उपस्थित असलेला शिवम यादव अचानक पळू लागला. त्याने मैदानाची भिंत ओलांडून फरार होण्याचा प्रयत्न केला. मात्र, पोलिसांनी पाठलाग करून त्याला ताब्यात घेतले.

कागदपत्रांची तपासणी आणि चौकशी केल्यानंतर शिवम यादव हा अंकित तिवारीच्या जागी शारीरिक पात्रता परीक्षा देण्यासाठी आल्याचे समोर आले. त्यामुळे रेल्वे भरती प्रक्रियेत बनावट उमेदवाराच्या माध्यमातून फर्जीवाडा करण्याचा प्रयत्न झाल्याचे स्पष्ट झाले.

आणखी एका उमेदवाराच्या जागी परीक्षा दिल्याचा आरोप

दरम्यान, तपासादरम्यान आणखी एक धक्कादायक प्रकरण समोर आले आहे. बुधाराम मीना याने राहुल मीना याच्या जागी परीक्षा दिल्याचा आरोप आहे. त्यामुळे रेल्वे ग्रुप ‘डी’ भरतीच्या परीक्षेत एकापेक्षा अधिक ठिकाणी डमी उमेदवारांचा वापर झाल्याचा संशय व्यक्त केला जात आहे. या प्रकरणी अजनी पोलिसांनी चार आरोपींविरुद्ध गुन्हा दाखल केला आहे. बनावट कागदपत्रे तयार करणे, त्यांचा वापर करणे आणि परीक्षा प्रक्रियेत फसवणूक करण्यामागे आणखी कोणाचा सहभाग आहे का, याचा तपास पोलिसांकडून सुरू आहे.

रेल्वे भरतीसारख्या महत्त्वाच्या परीक्षांमध्ये उमेदवारांची ओळख आणि कागदपत्रांची काटेकोर तपासणी केली जात असतानाही डमी उमेदवारांच्या माध्यमातून फर्जीवाडा करण्याचा प्रयत्न झाल्याने या घटनेची गंभीर दखल घेण्यात आली आहे. या प्रकरणातील इतर आरोपी आणि संपूर्ण फर्जीवाड्यामागील सूत्रधार कोण, याचा शोध आता पोलिस घेत आहेत.