भाजपच्या नागपूर शहर अध्यक्षपदी बंटी कुकडे, जाणून घ्या बंटी कुकडे यांचा राजकीय प्रवास

नागपूर : नागपूर हा केंद्रीय मंत्री नितीन गडकरी, उपमुख्यमंत्री देवेंद्र फडणवीस आणि प्रदेशाध्यक्ष चंद्रशेखर बावनकुळे यांचा गृह जिल्हा. त्यामुळे नागपूरकडे संपूर्ण राज्याचा लक्ष लागून असतं. अशात आगामी महापालिका निवडणुकांच्या पार्श्वभूमीवर भाजपतर्फे संघटनात्मक बदल करण्यात आले आहेत. यात नागपूर शहराध्यक्ष म्हणून बंटी कुकडे यांची निवड करण्यात आली आहे. महाराष्ट्र भारतीय जनता पक्षाने अलीकडेच नव्या शहर आणि ग्रामीण जिल्हाध्यक्षांची नियुक्ती केली. यात नागपूर शहर अध्यक्षपदी जितेंद्र उर्फ बंटी कुकडे यांची निवड झाली आहे. तरुण नेत्याकडे भाजपने शहराची धुरा सोपवली आहे. तर, येत्या मनपा निवडणुकीत भाजपच्या नगरसेवकांची संख्या 120 वर नेण्याचा संकल्प बंटी कुकडे यांनी केला आहे.

असा आहे राजकीय प्रवास

बंटी कुकडे हे सुरुवातीपासून संघ परिवारातील आहेत. आधी बजरंग दल शहराध्यक्ष, भारतीय जनता युवा मोर्चाचे अध्यक्ष झाले. त्यानंतर भाजप नगरसेवक असा बंटी कुकडे यांचा राजकीय प्रवास राहिला आहे. तरुणांमध्ये बंटी कुकडे यांचा चांगला प्रभाव राहिलेला आहे. शिवाय ते चांगले वक्तेदेखील आहेत.

१२० नगरसेवक निवडून आणण्याचा संकल्प

महापालिकेत गेल्या निवडणुकीत भाजपचे 108 नगरसेवक निवडून आले होते. येत्या निवडणुकीत 120 नगरसेवक निवडून आणणार असा संकल्प बंटी कुकडे यांचा आहे. मात्र बंटी कुकडे ज्याप्रमाणे म्हणतात तेवढं त्यांच्यासमोरच आव्हान सोपं नाही. गेल्या मनपा निवडणुकीत निवडून आलेल्यांपैकी अर्धी संख्या महिला नगरसेवकांची होती.

काही नगरसेवकांवर नाराजी

यापैकी अनेक जण पाच वर्षे घराच्या बाहेरच पडले नाही, असा आरोप करण्यात आला होता. अनेक नगरसेवकांनी कामे केली नसल्याने त्यांच्या विरोधात नाराजी असल्याचेही भाजपच्या अंतर्गत सर्वेतून समोर आलं होतं. सध्याची राजकीय परिस्थिती आणि गेल्या पंधरा वर्षापासून सतत भाजप सत्तेत असल्याने अँटी इन कम्बस्नी कसे हाताळतात यावरच त्यांचा कस लागणार आहे.