नरेंद्र मोदी विरुद्ध शरद पवार : महाराष्ट्रात लोकसभेचा प्रचार तापला
महाराष्ट्रात पंतप्रधान मोदींनी काही दिवसांपासून प्रचाराचा धडाका लावला आहे. आतापर्यंत त्यांनी अनेक सभा महाराष्ट्रात घेतल्या आहेत. या प्रत्येक सभेत त्यांनी शरद पवार आणि उद्धव ठाकरे यांच्यावर जोरदार टीका केली आहे. त्यामुळे राज्यात आता महायुती विरुद्ध महाविकासआघाडी प्रचार तापला आहे.
महाराष्ट्रात लोकसभेचा प्रचार सध्या मोदी विरुद्ध शरद पवार असा झाला आहे. 2 दिवसांत मोदींनी महाराष्ट्रात 6 सभा घेतल्या आहेत. आणि या सभेतून मोदींच्या निशाण्यावर शरद पवारच अधिक वेळ आले. मोदींनी भटकती आत्मा अशी टीका केल्यानंतर प्रचार आणखी तापला आहे. महाराष्ट्राच्या प्रचारात मोदींच्या एका वक्तव्यानं राजकारण चांगलंच तापलंय. अर्थात मोदींनी पुण्याच्या सभेतून भटकती आत्मा शरद पवारांनाच म्हटलं इच्छा पूर्ण न झालेली भटकती आत्मा इतरांचाही खेळ बिघडवते. पुलोदच्या सरकारचा दाखला देत मोदींनी पवारांवर अस्थिरतेचा खेळ सुरु केल्याचा आरोप केला.
मोदींच्या टीकेला पवारांचं उत्तर
मोदींच्या या टीकेला खुद्द शरद पवारांनी उत्तर दिलंय. लोकांचं दु:ख बघून माझा आत्मा तडफडतो. पण मी लाचार नाही. कोणाचे पक्ष फोडले नाही, घरातली माणसं फोडली नाहीत असं प्रत्युत्तर शरद पवारांनी दिलं आहे. आता मोदींनी शरद पवारांना भटकती आत्मा म्हटल्यानंतर महाविकास आघाडीचे नेतेही तुटून पडले आहेत. मोदींचा गुजरातचा अतृप्त आत्मा महाराष्ट्रात भटकतोय, अशी टीका राऊतांनी केली. उद्धव ठाकरे यांनी देखील पीएम मोदींवर टीका केली आहे. महाराष्ट्र गद्दार नाहीये. भाजप सर्व चोरांना घेत आहे. औरंगजेबचा आत्मा अजूनही इथे भटकत असेल. असं ही त्यांनी म्हटलंय.
भटकती आत्म्याच्या टीकेला शरद पवारांनीच सभेतूनच उत्तर दिलं तर ही भटकती आत्मा नेमकी कोण हे मोदींनाच विचारणार असल्याचं अजित पवारांनी म्हटलं. पुण्यातल्या सभेनंतर, माढ्यातूनही मोदींनी शरद पवारांवर पुन्हा टीकास्त्र सोडलं. रणजित सिंह नाईक निंबाळकरांच्या प्रचारासाठी मोदींनी माढ्यात सभा घेतली. 2009 मधून स्वत: शरद पवारांना माढ्यातून लोकसभेची निवडणूक लढत खासदार झाले. पण बुडत्या सूर्याची शपथ घेणाऱ्या शरद पवारांनी माढ्यात पाणी आणलं का ? म्हणून आता शरद पवारांची माढ्यातून लढण्याची हिंमत नाही, असा हल्लाबोल मोदींना केलाय.
माढ्यात काट्याची टक्कर
माढ्यात भाजप आणि शरद पवारांच्या राष्ट्रवादीत काट्याची टक्कर आहे. भाजपच्या रणजित सिंह निंबाळकरांविरोधात भाजपातून पवार गटात आलेल्या धैर्यशील मोहितेंमध्ये थेट लढत आहे. आणि माढ्याच्या जागा किती प्रतिष्ठेची झाली हे मोदींच्या सभेवरुन स्पष्ट दिसतेय.
