Gautami Patil | गौतमी पाटील हिचा डान्स आणि फटका मात्र सोसावा लागतोय गरीबाला
गौतमी पाटील हिच्या कार्यक्रमाचा अहमदनगरमधील एका दुकानदाराला नाहक त्रास सोसावा लागतोय. गौतमीच्या अदांवर खरंतर हजारो तरुण फिदा होताना दिसतात. पण या दुकानदाराला तिच्या कार्यक्रमामुळे नाहक त्रासाला सामोरं जावं लागल्याचं समोर आलं आहे.
अहमदनगर : ‘कुणाच्या खांद्यावर कुणाचे ओझे’, असं गाणं आपण ऐकलं आहे. याशिवाय करतं कोण आणि भरतं कोण, अशी म्हण देखील आपण ऐकली आहे. या गाण्याचा आणि म्हणीचा वेगवेगळ्या परिस्थितीत निघणारा अर्थ मात्र एकच असतो. आपण जी कर्म करतो त्यांची परतफेड आपल्याला इथेच करावी लागतात, असं बोलतात. पण काही गोष्टी त्याला अपवाद असतात. कुणीतरी काहीतरी करुन जातं किंवा कुणामुळे तरी काहीतरी विपरीत घडून जातं आणि त्याचे दुष्परिणाम ज्याचा त्या गोष्टीशी काहीच संबंध नाही त्यांना भोगावे लागतात. बऱ्याचदा अशा प्रकरणांमध्ये ज्यांची बाजू कमकुवत असते त्यांनाच जास्त भोगावं लागतं. म्हणजे ते स्वभावाने गरीब असतात, शांत असतात, त्यामुळे ते हा त्रास सोसून घेतात. काही लोक आपल्याला होणाऱ्या त्रासानंतर न्याय मिळवण्यासाठी प्रयत्न करतात. पण पदरात निराशाच पडते. असाच काहीसा प्रकार नगरमध्ये बघायला मिळतोय.
नेमकं प्रकरण काय?
विशेष म्हणजे आम्ही ज्या प्रकरणाची माहिती सांगतोय त्याचा संबंध थेट डान्सर गौतमी पाटील (Gautami Patil) हिच्यासोबत आहे. आता तुम्ही म्हणाल गौतमी पाटील हिचा काय संबंध? पण थांबा, गौतमी पाटीलचा या प्रकरणात खरंच संबंध आहे की नाही ते तुम्हीच ठरवा. त्याचं झालं असं की, पारनेर तालुक्यात जवळे येथे गौतमी पाटीलचा कार्यक्रम आयोजित करण्यात आला होता. पैलवान जयदीप सालके आणि सौरव लोखंडे यांच्या वाढदिवसाच्या निमित्त हा कार्यक्रम अयोजिय करण्यात आला होता. गौतमी पाटील कार्यक्रमाला येणार म्हटल्यावर तरुणांची झुंबड उडणार हे साहजिकच आहे. पण याच झुंबडमुळे एका गरीब दुकानदाराला नाहक मनस्तापाला सामोरं जावं लागत असल्याचं समोर आलं आहे.
डान्सर गौतमी पाटील हिच्या कार्यक्रमाला होणारी गर्दी
संबंधित कार्यक्रमात गौतमी नेहमीप्रमाणे चांगलीत थिरकली. प्रेक्षकांनी देखील गौतमी पाटीलच्या अदाकारींवर ठेका धरला. यावेळी प्रेक्षक गौतमीच्या अदाकारींवर बेभान होऊन नाचले. तर काही प्रेक्षक कार्यक्रम पाहण्यासाठी ग्रामपंचायतने बांधलेल्या गाळ्यांवरती चढल्याने एका गाळ्याचा पत्रा फुटला. त्यामुळे गाळाधारकाला मनस्ताप सहन करावा लागला. विशेष म्हणजे या गाळाधारकाची परिस्थिती आधीच बेताची आहे. त्यामुळे त्याने नुकसान भरपाईची मागणी केलीय. पण त्याच्या भरपाईची कुणीही दखल घेईना. त्यांच्या नुकसान भरपाईच्या मागणीकडे पद्धतीशरपणे दुर्लक्ष केले जात आहे. त्यामुळे दुकानदाराला विनाकारण गौतमीच्या अदांचा नाहक भुर्दंड सोसावा लागत आहे.
