Nanded | खासगी बसची दुचाकीला जोरदार धडक, गर्भवती महिलेचा जागीच मृत्यू, नांदेडमध्ये भीषण घटना!
खाजगी बसने दिलेल्या धडकेत जी गर्भवती महिला ठार झाली, तिचं नाव इंदूबाई डांगे असं होतं. इंदूबाई डांगे आणि त्यांचे पती नांदेड येथून त्रिकूटकडे जात होत्या.
नांदेडः शहराजवळच्या माळटेकडी भागात एक भीषण अपघात (Terrible Accident) घडला आहे. भरधाव वेगाने जाणाऱ्या खाजगी बसने (Private bus) दुचाकीला धडक दिली. या अपघातात दुचाकीवरील गर्भवती महिला (Pregnant Woman) गंभीर जखमी झाली. तिचा जागीच मृत्यू झाला. हा अपघात इतका भीषण होता की धडक दिल्यानंतर दुचाकीचा चक्काचूर झाला. या घटनेत गर्भवती महिलेच्या पतीलाही गंभीर दुखापत झाली असून त्यांच्यावर उपचार सुरु आहेत. तसेच आणखी दोघांनाही या घटनेत इजा झाली असून त्याच्यावरही शासकीय रुग्णालयात उपचार सुरु आहेत.
माळटेकडी परिसरात अपघात
खाजगी बसने दिलेल्या धडकेत जी गर्भवती महिला ठार झाली, तिचं नाव इंदूबाई डांगे असं होतं. इंदूबाई डांगे आणि त्यांचे पती नांदेड येथून त्रिकूटकडे जात होत्या. हा अपघात नेमका कसा झाला, ही माहिती अद्याप समोर आली नाही. पण खासगी बसने दुचाकीला धडक दिल्याने ही घटना घडली. अपघात घडल्यानंतर रस्त्यावरील अनेकजण मदतीसाठी धावले. मात्र गर्भवती महिला बसच्या धडकेने खाली कोसळल्याने तिचा जागीच मृत्यू झाला होता. मात्र इतर जे गंभीर जखमी होते, त्यांना प्रत्यक्षदर्शींनी लवकरात लवकर रुग्णालयात नेण्याची व्यवस्था केली.
बीड़मध्ये अपघातात पती-पत्नी ठार
बीडमधील पाटोदा गावाजवळ वांजरा फाटा येथे कारला भीषण अपघात झाला. कारमध्ये उस्मानाबादमधील भूम येथील रहिवासी अशोक देशमुख आणि संगीता देशमुख हे पती पत्नी होते. अपघातानंतर हे दोघेही जागीच ठार झाले. तर आणखी एका गंभीर जखमी व्यक्तीवर उपचार सुरु आहेत.
