मोठी बातमी! पुण्यात इमारत कोसळली, 14 लोक अडकल्याची भीती; मोशी परिसरात खळबळ

गेल्या काही दिवसांपासून राज्याच्या विविध भागात मुसळधार पावसाचा कहर पहायला मिळत आहे. पुण्याच्या वेगवेगळ्या भागातही पावसाने कहर केला आहे. अशातच आता पिंपरी चिंचवडमधून मोठी बातमी समोर आली आहे. मोशी कचरा डेपो जवळ एक मोठी इमारत कोसळली आहे. या इमारतीच्या ढिगाऱ्याखाली जवळपास 14 जण अडकल्याची भीती व्यक्त करण्यात येत आहे. घटनेची माहिती मिळताच बचाव कार्य करण्यासाठी अग्निशमन दल घटनास्थळाकडे रवाना झाले असल्याची माहिती समोर आली आहे.

14 ते 15 लोक अडकल्याची भीती

पिंपरी चिंचवडच्या मोशी कचरा डेपो जवळ एक मोठी इमारत कोसळली असल्याची माहिती समोर आली आहे. या इमारतीच्या ढिगाऱ्याखाली 14-15 लोक अडकले असल्याची प्राथमिक माहिती समोर आली आहे. या घटनेची माहिती मिळतात प्रशासनाने मदतकार्य सुरू केले असून अग्निशमन दल घटनास्थळी पोहोचले आहे. सध्या आतमध्ये अडकलेल्या लोकांना वाचवण्याचे काम सुरू असल्याची माहिती समोर आली आहे.

जळगावच्या पाचोऱ्यात घर कोसळले

पाचोरा शहरात सततधार पावसामुळे गोंड वस्ती परिसरातील एक घर अचानक कोसळल्याची घटना घडली. या दुर्घटनेत घरातील एक चिमुकली ढिगाऱ्याखाली दबली गेली होती. घटनेची माहिती मिळताच स्थानिक नागरिक आणि शिवसेना शहर प्रमुख सुमित सावंत यांनी तातडीने बचावकार्य करून चिमुकलीला बाहेर काढले. चिमुकलीवर प्राथमिक उपचार पाचोरा येथील खाजगी रुग्णालयात उपचार करण्यात आले. मात्र, तिची प्रकृती चिंताजनक असल्याने पुढील उपचारासाठी तिला तातडीने जळगाव येथील शासकीय रुग्णालयात हलवण्यात आल्याची माहिती समोर आली आहे.

पालघरमध्येही घर कोसळलं

पालघमध्ये मध्यरात्री झालेल्या वादळी पावसामुळे डहाणूतील सोनाळ्याच्या खुबरोद पाडा येथे मध्यरात्री राहतं घर कोसळलं. यशवंत सापटा यांचं राहतं घर मध्यरात्री एक वाजताच्या सुमारास कोसळलं. या घटनेत घरात झोपलेले आठ जण किरकोळ जखमी झाले आहेत. सुदैवाने कोणतीही जीवितहानी झाली नाही, मात्र घरासह घरातील साहित्य, अन्नधान्य याचे मोठ्या प्रमाणावर नुकसान झाले आहे. सापटा यांच कुटुंब भर पावसात उघड्यावर आले आहे. राहण्यासाठी छत आणि खाण्यासाठी अन्नधान्य शिल्लक नसल्याने शासनाकडून तातडीने मदत मिळण्याची या कुटुंबाने मागणी केली आहे.