कसबा, पिंपरी चिंचवड पोटनिवडणुकीसंदर्भात भाजपचे खलबते, बावनकुळेंचा बैठकांचा जोर

अभिजीत पोते, पुणे : पुणे कसबा पेठ विधानसभा (Pune Bypoll Election) पोटनिवडणुकीत भाजपसमोर महाविकास आघाडीने आव्हान उभं केलंय. यामुळे भाजपनं आपली सगळी ताकद पणाला लावलीय. भाजपचे दोन मंत्री रवींद्र चव्हाण (Ravindra Chavhan) आणि गिरीश महाजन (Girish Mahajan) हे 26 तारखेपर्यंत पुण्यात तळ ठोकून राहणार आहेत. बुधवारी भाजपचे प्रदेशाध्यक्ष चंद्रशेखर बावनकुळे दिवसभर कसबा मतदारसंघात (Kasba Peth Assembly Constituency) आहेत. त्यांनी संघ पदाधिकाऱ्यांसोबत बैठक घेतली. त्यानंतर महायुतीची बैठक सुरू झालीय.

भाजपकडून हेमंत रासने यांना उमेदवारी दिली गेली आहे. त्यामुळे ब्राम्हण समाज नाराज झाला आहे. हिंदू महासंघाचे आनंद दवे निवडणुकीच्या रिंगणात उतरले आहेत. त्याचा परिणाम भारतीय जनता पक्षाच्या मतांवर होणार आहे. कसबा पेठ येथे भाजपचे हेमंत रासने, काँग्रेसचे रवींद्र धंगेकर आणि हिंदू महासंघाचे आनंद दवे यांच्यात प्रमुख लढत होत आहे.

कसबा पेठ हा मतदारसंघ 1978 पासून भाजपचा बालेकिल्ला आहे. परंतु ब्राम्हण समाज नाराज आहे. कारण टिळक परिवारात भाजपने उमेदवारी दिली नाही किंवा ब्राम्हण उमेदवारही दिला नाही. यामुळे दोन वेळा पोस्टर लावण्यात आले होते. त्यात आम्ही नोटाचे बटन दाबणार असल्याचे म्हटले होते. तसेच आनंद दवे यांच्यांमुळे ३० टक्के एकगठ्ठा भाजपची मते विभाजली जाणार आहे.

संघ कार्यालयात बैठक

कसबा पेठेतील या परिस्थितीमुळे भाजप प्रदेशाध्यक्ष चंद्रशेखर बावनकुळे यांच्या प्रमुख उपस्थितीत बैठकांचे सत्र सुरु झाले. बुधवारी सकाळी संघ कार्यालयात ते गेले. त्यांनी संघ पदाधिकाऱ्यांशी चर्चा केली. चर्चेचा तपशील बाहेर आला नसला तरी कसबा मतदार संघात एकंदरीत निर्माण झालेल्या परिस्थितीवर चर्चा झाली. या परिस्थितीचा फायदा काँग्रेस उमेदवाराला होऊ नये म्हणून रणनीती ठरवण्यात आली.

महायुतीची बैठक

बावनकुळे यांनी पुण्यातील संघाच्या कार्यालयात बैठक घेतली. त्यानंतर महायुतीची बैठक घेण्यात आली. त्यात शिंदे गट, आरपीआय, रासप आणि शिवसंग्रामचे पदाधिकारी उपस्थित होते. बैठकीत कसब्यातील प्रचार रणनीतीवर चर्चा झाल्याची माहिती सूत्रांनी दिली.

मनसे अध्यक्ष राज ठाकरे यांनी अखेर कसबापेठ आणि चिंचवड विधानसभा पोटनिवडणुकीत भाजपला पाठिंबा दिला आहे. भाजप नेत्यांनी मनसेच्या नेत्यांची भेट घेऊन चर्चा केल्यानंतर मनसेने हा मोठा निर्णय घेतला आहे.  त्यामुळे भाजपला दिलासा मिळाला आहे.

कसबा विधानसभा पोटनिवडणुकीच्या पार्श्वभूमीवर पुणे पोलिसांनी काल रुट मार्च केला. स्थानिक पोलीस आणि एसआरपीएफची तुकडीने हा रुट मार्च केला. कायदा आणि सुव्यवस्था राखण्यासाठी पोलीस सज्ज झाले आहेत.