त्यांना काय हवंय ते अद्याप… छगन भुजबळ यांचं विलिनीकरणावर मोठं विधान; पडद्यामागे काय घडतंय?

chhagan bhujbal

राष्ट्रवादीचे नेते छगन भुजबळ यांनी विलिनीकरणाच्या मुद्द्यावर मोठं भाष्य केलं आहे. आमच्या पक्षातील सर्व नेते आणि आम्ही बसून निर्णय घेऊ. त्यांना काय हवंय हे अद्याप आम्हाला कळलं नाही. आम्ही विचार करतो तेव्हा हे कसं काय जमणार आहे? सर्व एनडीएत जाणार आहेत? की सर्व इंडिया आघाडीत जाणार आहेत? याचा शोधबोध झाला नाही. सुनेत्रा ताईंनी सांगितल्याप्रमाणे योग्य वेळ येईल तेव्हा सर्वांना कळेल. त्या आधी मला खात्री आहे, सुनेत्राताई आम्हा सर्वांना विश्वासत घेऊन सांगतील, अशी प्रतिक्रिया छगन भुजबळ यांनी व्यक्त केली. भुजबळ यांनी थेटच प्रतिक्रिया दिल्याने दोन्ही राष्ट्रवादीच विलिनीकरणाची चर्चा सुरू असल्याचे संकेत मिळत आहेत. मीडियाशी संवाद साधत असताना भुजबळ यांनी हे महत्त्वाचं विधान केलं आहे.

विलिनीकरणाच्या चर्चा आम्ही सुद्धा ऐकत आहोत. सध्या मर्जर मर्जरचा खेळ सुरू आहे. विलिनीकरण व्हायचंच असेल तर दोन्ही बाजूने सांघिकरित्या खेळलं पाहिजे. एखादा प्लेअर जातो, तिकडे संपूर्ण टीम असते. काही चर्चा होते. मग काही झालं तर परत घरी येतात, असं चालत नाही. सांघिकरित्या खेळा. क्रिकेटची मॅच सुरू आहे. एकमेकांच्या गळ्यात हात घालून ठरवा. एकत्रितरित्या ठरवा. तुटक तुटक कुणीही असं काही करावं असं वाटत नाही, असं छगन भुजबळ म्हणाले. आमच्यापर्यंत विलिनीकरणाच्या गोष्टी आल्या नाहीत. आम्हीही टीव्हीवर पाहत आहोत. कोण भेटतंय, कोण जातंय, काय झालं ते कळत नाही. तुम्ही त्यातून जो निष्कर्ष काढता तो आम्ही ऐकत असतो, असंही त्यांनी म्हटलंय.

शरद पवार माझे नेते

शरद पवार यांना अजितदादा गटाचे आमदार भेटत आहेत. त्यावरही त्यांनी भाष्य केलं. पवार साहेबांना भेटायला मीही गेलो होतो. हॉस्पिटलमध्ये गेलो होतो. घरीही गेलो होतो. त्यांच्या तब्येतीची विचारपूस करण्यासाठी जाणं चूक नाही. माझ्या आयुष्यात दोन नेते आहेत. एक बाळासाहेब ठाकरे आणि दुसरे शरद पवार आहे. हे दोन्ही नेते माझे मार्गदर्शक आहेत. दुर्देवाने बाळासाहेब आज हयात नाही. पण शरद पवार यांचा पक्ष वेगळा आहे. मी वेगळ्या पक्षात आहे. बाकी सर्व माझे सहकारी आहेत. पक्षातील नेते आहेत, असं भुजबळ यांनी स्पष्ट केलं.

पवारांना भेटलो, पण चर्चा नाही

मीही शरद पवारांना भेटलो. पण मर्जर मर्जर खेळाची चर्चा केली नाही. आमचे चांगले संबंध आहेत. पवारांचा स्वभाव असा आहे की, राजकारणातील किती मोठा दुश्मन असला तरी ते त्याच्याशी संबंध ठेवतात. त्याच्याशी प्रेमाने बोलतात. प्रत्येक गोष्टीत शत्रूत्व ठेवत नाहीत. ही गोष्ट आम्ही शिकलो. राज्यातील ते सर्वात ज्येष्ठ नेते आहेत, असं त्यांनी सांगितलं.

दोन्ही पवार एकत्र आले तर आनंदच

सर्व एकत्र आले तर आनंद आहे. उद्या दोन्ही शिवसेना एकत्र आल्या, ठाकरे बंधू एकत्र आले तर जुन्या शिवसैनिकांना आनंद होईल. तसेच दोन पवार एकत्र आले तर ज्यांनी राष्ट्रवादी स्थापन करण्यात मोलाचा वाटा उचलणाऱ्यांना आनंद होईल. शरद पवार आणि मी राष्ट्रवादीची स्थापना केली. काही लोक त्यावेळी राष्ट्रवादीत यायला मागे पुढे पाहत होते. काँग्रेसमध्ये राहावं की राष्ट्रवादीत यावं असं त्यांना वाटत होतं. त्यामुळे काही लोकं चार महिन्याने राष्ट्रवादीत आले. काही सहा महिन्याने आले. पण दोन्ही पवार एकत्र आले तर जुन्या जाणत्यांना आनंदच होईल, असं ते म्हणाले.