Pune crime : देहूरोड पोलीस ठाण्याच्या हद्दीत फोफावले अवैध धंदे, शाळकरी मुलगीच विकतेय दारू? पोलिसांची हाताची घडी, तोंडावर बोट!

पुणे : देहूरोड येथे एक शाळकरी मुलगी गावठी दारू (Illegal liquor) विकत असल्याचा धक्कादायक प्रकार समोर आला आहे. याविषयीचा एक व्हिडिओ सोशल मीडियावर वाऱ्यासारखा पसरत आहे. त्याची टीव्ही 9 मराठीने पडताळणी केली आहे. हा व्हिडिओ सामाजिक कार्यकर्ते श्रीजीत रमेशन यांनी काढला असल्याचे समोर आले आहे. देहूरोड पोलीस ठाण्याच्या (Dehu road police station) हद्दीत अवैध धंदे, गावठी दारूचे अड्डे असतानाही देहूरोड पोलीस हाताची घडी आणि तोंडावर बोट अशा कृतीत का? असा प्रश्न त्यांनी केला आहे. शाळकरी मुलीच्या व्हिडिओबाबत पोलीस आयुक्त अंकुश शिंदे (Ankush Shinde, Commissioner of Police, Pimpri Chinchwad) यांनी गुन्हे शाखेला चौकशीचे आदेश दिले आहेत. पोलिसांच्या आशीर्वादाने हे अवैध धंदे सुरू असतील तर त्यांच्यावरही कारवाई करणार असल्याची माहिती त्यांनी टीव्ही 9 मराठीला दिली आहे. देहूरोड पोलीस ठाण्याचा कारभार एक महिला पोलीस अधिकारी पाहतात.

वरिष्ठ महिला पोलीस अधिकाऱ्याचा आशीर्वाद?

अवैध धंदे, गावठी दारू बंद होईल, अशी अशा या परिसरातील सर्वांना होती. परंतु, असे काहीही घडले नाही. उलट तेथील अवैध धंदे, गावठी दारूच्या भट्ट्या अधीकच जोमात चालू लागल्याचे समोर आले आहे. वरिष्ठ महिला पोलीस अधिकाऱ्याचा आशीर्वाद त्यांच्यावर असल्याचा आरोप सामाजिक कार्यकर्ते श्रीजीत रमेशन यांनी केला आहे.

व्हिडिओतून उजेडात आला प्रकार

रमेशन यांनी देहूरोड हद्दीतील अवैध धंद्यांची पोलखोल करण्यासाठी एक व्हिडिओ टीम प्रत्येक ठिकाणी पाठवली. त्यात शाळकरी मुलगी गावठी दारू विकताना व्हिडिओतून उजेडात आली आहे. विशेष म्हणजे एक महिला पोलीस अधिकारी एका शाळकरी मुलीला दारू विकण्यासाठी प्रोत्साहित करत आहेत का, असा प्रश्न उपस्थित होत आहे. शाळकरी मुलगी ग्राहकाला दारू किती द्यायची, अशी विचारणा करत असून घरातच हा घरगुती बार थाटल्याचे पाहायला मिळत आहे.

काय कारवाई होणार?

एकीकडे गुन्हेगारी फोफावलेल्या पिंपरी-चिंचवडची दुसरी बाजूदेखील गुन्हेगारीने, काळवंडलेली आहे, हे पुन्हा एकदा सिद्ध झाले आहे. त्यामुळे पिंपरी चिंचवड पोलीस आयुक्तालयातील वरिष्ठ पोलीस अधिकारी याकडे कसे पाहतात आणि महिला पोलीस अधिकाऱ्यावर काय कारवाई करणार, हे पाहावे लागणार आहे.