मोदींच्या अगाध ज्ञानाचं कौतुक वाटतं; शरद पवार यांनी लगावला टोला

मराठवाडा विद्यापीठ नामांतराचा ठराव विधानसभेत एकमताने मंजूर करण्यात आला होता, मात्र त्यानंतर अनेक ठिकाणी वातावरण पेटलं होते. त्यावेळी आम्ही तरुणांची समजूत काढण्याचा प्रयन्त केला,शेवटी तो निर्णय मला स्थगित करावा लागला,मात्र व्यक्तिगत जीवनामध्ये माझ्यासाठी मोठा झटका होता. त्यानंतर मी पुन्हा मुख्यमंत्री झाल्यावर महाविद्यालयात गेलो विद्यार्थ्यांशी संवाद साधला,त्यानंतर नावात बदल करून हा नामांतराचा निर्णय घेण्यात आला, त्यावेळी अनेकांनी मला साथ दिली असे राष्ट्रवादी कॉंग्रेसचे नेते शरद पवार यांनी सांगितले. पुण्यात महात्मा गांधी स्मारक निधी आयोजित गांधी सप्ताहाची सुरुवात एका कार्यक्रमात झाली त्यावेळी ते बोलत होते.

शरद पवार पुढे म्हणाले की महात्मा गांधींचे विचार आज जगात स्वीकाराले गेले आहेत. महात्मा गांधींनी जगात देशाची प्रतिष्ठा वाढवली,मात्र आपल्या पंतप्रधानांनी कुठेतरी भाषणात म्हटलं होतं की गांधी चित्रपटामुळे महात्मा गांधीचे नाव जगात प्रसिद्ध झाले, मला गंमत वाटते,आपल्या पंतप्रधानांच्या अगाध ज्ञानाचे मी कौतुक करतो अशा शब्दात शरद पवारांनी यावेळी पंतप्रधानांवर टीका केली.

कोथरुडला मिनी पाकिस्तान करायचाय

कुमार सप्तर्षी आपल्या भाषणात म्हणाले की यांना कोथरूडला मिनी पाकिस्तान करायचा आहे. कोथरूडमध्ये कोणत्याही मुस्लिम व्यक्तीला फ्लॅट मिळत नाही. मिळालाच तर त्याला आजूबाजूची लोकं त्याला हाकलून देतात. कोथरूडमध्ये गांधी भवन असल्याने कोथरूड मधील नेता चंपा यांनी दहा एकर जागेवर पाडकाम केले. महानगरपालिकेच्या आयुक्तांना विश्वासात न घेता पाडकाम केले, बरं झालं त्यांचं पालकमंत्री पद गेलं असेही कुमार सप्तर्षी यावेळी म्हणाले. ते पुढे म्हणाले की अजित पवार फुटून सरकारमध्ये गेल्याचं वाईट वाटतं. पण बरं झालं ते पालकमंत्री झाले आणि पाटील यांच्याकडून पालकमंत्री पद काढून घेण्यात आलं. शरद पवार यांना तुम्ही काही बोलू शकता. पण जातीयवादी बोलू शकत नाही. ते कधीच जातीवादी होऊ शकत नाहीत. आम्हाला कधीच जात नको होती. जातीयवादाच्यावर जाऊन त्यांनी भीष्माचार्याचा रोल पार पाडला. आम्ही त्यांच्या कायम पाठीशी उभे राहू असेही कुमार सप्तर्षी यावेळी म्हणाले.