SPPU : सावित्रीबाई फुले पुणे विद्यापीठाचा चढता आलेख! 50 गुणांची कमाई करत पटकावलं जगातल्या सर्वोत्तम 550 विद्यापीठांमध्ये स्थान

पुणे : सावित्रीबाई फुले पुणे विद्यापीठाने (Savitribai Phule Pune University) बुधवारी जाहीर केलेल्या QS वर्ल्ड युनिव्हर्सिटी रँकिंग 2022मध्ये पुन्हा चांगली कामगिरी केली आहे. मागील वर्षी सावित्रीबाई फुले पुणे विद्यापीठ 591-600 या ब्रॅकेटमध्ये होते. त्यावरून झेप घेत यावर्षी विद्यापीठाने 541-550 रँक ब्रॅकेटमध्ये आपले स्थान निश्चित केले आहे. जागतिक दर्जाचे उच्च शिक्षण (Global higher education), प्राध्यापक विद्यार्थ्यांचे गुणोत्तर, संशोधन आणि प्रकाशनांमध्ये प्रति शिक्षक संदर्भ, अध्यापनशास्त्र, आंतरराष्ट्रीय प्राध्यापक आणि विद्यार्थी, नियोक्ता धारणा यासह अनेक निकष (Parameters) एकत्रित केलेल्या गुणांच्या आधारे जगभरातील विद्यापीठांना रँक दिले जाते. यावर्षी IIT आणि IISc यांसारख्या भारतातील 41 संस्थांसह जगभरातील 1,422 संस्थांचे मूल्यांकन करण्यात आले. विद्यापीठे दरवर्षी या क्रमवारीच्या घोषणेची वाट पाहत असतात, त्यात सावित्रीबाई फुले पुणे विद्यापीठासाठी ही सकारात्मक बाब पुढे आली आहे.

सातत्याने रँकमध्ये वाढ

उल्लेखनीय बाब म्हणजे जागतिक क्रमवारीत विद्यापीठाची रँक गेल्या काही वर्षांपासून सातत्याने वाढत आहे. 2020मध्ये विद्यापीठ 800+ ब्रॅकेटमध्ये होते, म्हणजे केवळ दोन वर्षांत, विद्यापीठाने रँकिंगच्या बाबतीत जगभरातील 250 विद्यापीठांना मागे टाकले आहे. बहुतेक भारतीय विद्यापीठे QS द्वारे संस्थात्मक अध्यापन क्षमतेच्या मोजमापासाठी संघर्ष करत असताना, भारतातील 41 रँक असलेल्या तीस विद्यापीठांमध्ये फॅकल्टी आणि स्टुडंट रेशो (FSR) निर्देशकामध्ये घसरण होत आहे. दरम्यान, पुणे विद्यापीठ हे अव्वल स्थानावर असलेल्या दोन भारतीय विद्यापीठांपैकी एक आहे.

हे सुद्धा वाचा

Sant Tukaram maharaj palkhi : रथाला चकाकी देण्यासाठी देहूत मुस्लीम कारागीरांची लगबग; दोन वर्षांनंतर पालखी पंढरीकडे ठेवणार प्रस्थान

“तो फोटो आताचा नव्हेच! जुना फोटो दाखवून दिशाभूल केली जातेय”, नितेश राणे, अमेय खोपकरांच्या आरोपांना चंद्रकांत खैरेंचं उत्तर

Rajya Sabha Election 2022: दिलासा नाहीच! नवाब मलिक, अनिल देशमुखांना राज्यसभेसाठी मतदानाची परवानगी नाहीच, कोर्टाने अर्ज फेटाळला

प्रतिष्ठित विद्यापीठांच्या क्रमवारीत घसरण

नामांकित संस्थांपैकी दिल्ली विद्यापीठ, जवाहरलाल नेहरू विद्यापीठ (JNU) आणि जामिया मिलिया इस्लामिया सारख्या विद्यापीठांचे प्रतिष्ठित क्रमवारीतील स्थानात घसरण झाली आहे. 10व्या क्रमांकावर असलेले दिल्ली विद्यापीठ 501-510 ब्रॅकेटवरून 521-530वर घसरले, जेएनयूचे रँकिंग जे आधी 561-570 ब्रॅकेटमध्ये होते, ते 601-650 ब्रॅकेटमध्ये घसरले आणि जामिया मिलिया इस्लामिया, गेल्या वर्षी 751-800च्या दरम्यान होता, आता 801-1000च्या दरम्यान आहे. भारतीय विद्यापीठे आणि शैक्षणिक संस्थांपर्यंत, बेंगळुरूची इंडियन इन्स्टिट्यूट ऑफ सायन्स (IISc) 30 स्थानांनी प्रगती करत जगातील 155वे सर्वोत्तम विद्यापीठ बनले आहे आणि भारतातील शीर्षस्थानी आहे.