निकाल लागायच्या आधी पवारसाहेबांनी सांगितलं होतं की…; युगेंद्र पवारांनी सांगितली पडद्यामागची गोष्ट

लोकसभा निवडणुरीला बारामतीत शरद पवारांची लेक सुप्रिया सुळे विरूद्ध अजित पवारांच्या पत्नी सुनेत्रा पवार अशी थेट लढत झाली. पहिल्यांदाच पवार विरूद्ध पवार अशी लढत बारामतीकरांनी अनुभवली. या लढतीत नेमकं काय होणार? ही निवडणूर कोण जिंकणार याची सर्वत्र चर्चा झाली. मात्र या निवडणूक काळात शरद पवारांचं म्हणणं काय होतं? त्यांची मानसिकता काय होती? यावर अजित पवारांचे सख्खे पुतणे युगेंद्र पवार यांनी भाष्य केलं आहे. बारामतीतल्या शेतकरी मेळाव्यात बोलताना युगेंद्र पवार यांनी निवडणूक काळातील एक प्रसंग सांगितला.

“पवारसाहेब म्हणाले….”

आपण जेव्हा प्रचारात उतरलो. तेव्हा काय परिस्थिती होती हे आपण पाहिलं आहे. आपण आपल्या लाडक्या खासदार यांना चौथ्यांदा निवडून दिलंय. मला अपेक्षा नव्हती की 1. 5 लाख मतांनी निवडून येऊ. पण साहेबांना माहिती होतं की बारामतीकर आपल्याला कमी पडू देणार नाहीत. निकाल यायच्या आधी मला शरद पवारसाहेबांनी सांगितलं होतं की “मला वाटतं नाही बारामतीकर आपल्याला सोडतील”… 60 वर्षे तुम्ही पवारसाहेबांना साथ दिली. सुप्रियाताईंना साथ दिली आणि आम्हाला साथ दिली. विनंती करतो इथून पुढे आम्हाला साथ देत राहा. असं युगेंद्र पवार म्हणाले.

शरद पवारांसमोर बोलणं म्हणजे…- युगेंद्र पवार

शरद पवार सध्या बारामतीचा दौरा करत आहे. ठिकठिकाणी शेतकरी मेळाव्यांना शरद पवार हजेरी लावत आहेत. यावेळी युगेंद्र पवार हे देखील शरद पवार यांच्यासोबत आहेत. आज शेतकरी मेळाव्याला युगेंद्र पवारांनी संबोधित केलं. मला इथे बोलायचं आहे, याची काही मी तयारी नव्हती. पवारसाहेबांसमोर बोलणं म्हणजे सोपं नसतं. कारण एक आदरयुक्त भीती असते, असं युगेंद्र म्हणाले.

बारामतीतील डोर्लेवाडी गावात शेतकरी मेळावा झाला. शरद पवार या मेळाव्याला हजर होते. या मेळाव्याला शरद पवार , सुप्रिया सुळे , युगेंद्र पवार उपस्थित होते. यावेळी राजकारणात मी 1962 पासून काम सुरू केलं. 1967 मध्ये मला एक युवक म्हणून विधानसभेत पाठवलं. तिथून अनेक पद मिळालं. देश, आंतराष्ट्रीय पातळीवर काम करण्याची संधी तुमच्या आशीर्वादामुळे मिळाली. आज पुणे शहरानंतर बारामती हे शिक्षणाचे महत्त्वाचे केंद्र झालं आहे, असं शरद पवार म्हणाले.