Raj Thackeray: गणेशोत्सवात दंगल घडवणार? राज ठाकरे यांचा खळबळजनक दावा, कुणावर निशाणा?
Raj Thackeray on Riots: मनसे अध्यक्ष राज ठाकरे यांनी एका खळबळजनक दावा केला आहे. गणेशोत्सवात काय घडणार याविषयी त्यांनी मोठे भाष्य केले आहे. त्यांच्या वक्तव्याची मोठी चर्चा सुरू झाली आहे. त्यांनी या माध्यमातून कुणावर निशाणा साधला आहे?
मनसे अध्यक्ष राज ठाकरे यांनी आज एक खळबळजनक दावा केला आहे. गणेशोत्सवात दंगल घडवण्यात येणार असल्याचा आरोप त्यांनी केला. देशातील प्रश्नांना बगल देण्यासाठी दंगली घडवण्याचा डाव असल्याचा दावा राज ठाकरे यांनी केला. त्यासाठी मोठी यंत्रणा राबवली जात असल्याचा आरोपही त्यांनी केला. पण भाजपमधील लोक त्यावर बोलू शकत नाहीत, असे ते म्हणाले. या राज्याचे नागरीक म्हणून तुम्ही सतर्क राहा. जाणीवपूर्वक ते हे करतील, तुम्ही या गोष्टीपासून दूर राहा असे आवाहन त्यांनी केले.
महाराष्ट्र नवनिर्माण सेनेचा राज्यस्तरीय पदाधिकारी मेळावा आज 6 सप्टेंबर 2026 रोजी ठाण्यातील राम गणेश गडकरी रंगायतन नाट्यगृहात होत आहे. यावेळी राज ठाकरे यांनी देशातील विविध प्रश्नांवर मोठे भाष्य केले. त्यांनी सत्ताधारी भाजप सरकारवर सडकून टीका केली. त्यांनी यावेळी राज्यात दंगलीचे षडयंत्र घडवण्याचा डाव असल्याचा आरोप केला. त्यांच्या या आरोपामुळे एकच खळबळ उडाली आहे.
गणेशोत्सवात दंगली घडवण्याचा डाव
“तुम्हाला मु्द्दाम गुंतवून ठेवले जात आहे. सोशल मीडियावर पण हा मुद्दा चर्चेत आहे. आता गणपती येतील. 14 तारखेला गणपती येतील. मला सर्वाधिक भीती आहे की, गणपतीच्या दिवसात दंगली घडवल्या जातील. केवळ महाराष्ट्रात नाही म्हणत मी, देशात दंगली घडवल्या जातील, जेणेकरून तुम्ही त्यात अडकले पाहिजे, तुमचं इतर गोष्टीकडं दुर्लक्ष झालं पाहिजे. आताच मुंबईत त्याची झलक पाहिली तुम्ही.एक दोन घटना घडल्या, ही सुरुवात आहे. जो सुजाण हिंदू आहे. जो सुजाण मुस्लिम आहे. दोघांनाही सांगायचंय की सतर्क राहा. आपल्या नावाने, त्यांच्या नावाने यामध्ये कुणीतरी घुसवतील आणि दंगली घडवतील. हकनाक आपली पोरं जातील, त्यांची पोरं जातील. तिकडेच लक्ष जाईल तुमचं. एक दुसऱ्याचा दुस्वास करणे आणि त्यात गुंतवून ठेवणे, मूळ परिस्थितीकडे दुर्लक्ष करायला लावणे इतकाच कार्यक्रम आता सुरू आहे. आता देशाची परिस्थिती अत्यंत वाईट आहे.” असे मोठा दावा राज ठाकरे यांनी आजच्या भाषणातून केला.
मराठी-हिंदी वादावर काय आवाहन?
तर मराठी शिकण्याच्या मुद्दावर अमराठी भाषिकांना मुद्दामहून डिवचणारे वक्तव्य करायला लावले जात असल्याचा आरोप राज ठाकरे यांनी केला. हे मराठी लोक काय उखडतील? मराठी नाही बोलणार. हे बोलायला लावतायेत जेणेकरून तुम्ही त्यात अडकाल. आता नवी मुंबईत हिंदी भाषिक संमेलन होत आहे. अमित शाह वैगरे येणार आहेत तिथे. लगेच बातम्या सुरू झाल्या. महाराष्ट्रात हिंदी संमेलन होत असल्याचा बातम्या आल्या. हे संमेलन होऊन जाऊ द्या. दुर्लक्ष करा त्या गोष्टीकडे. हिंदी संमेलनाला येऊन सुद्धा अमित शाह यांचं हिंदी चांगलं नाही होऊ शकत. कारण तेही परेस, जयेस वालेच आहेत, असा चिमटा राज ठाकरे यांनी काढला. या वादात न अडकण्याचे आवाहन राज ठाकरे यांनी केले.
